قدم تليفزيون اليوم السابع، فى تغطيته الخاصة قدمتها شروق وجدى، تفاصيل اختيار الأم المثالية على مستوى الجمهورية من قبل وزارة التضامن احتفالا بعيد الأم، باستضافة فاطمة سيد أحمد، الأم المثالية على مستوى الجمهورية.
وأوضحت الأم المثالية على مستوى الجمهورية، "الناس كانت بتقولى إنتى بـ100 راجل، وأنا اشتغلت حاجات كتير، واشتغلت فى مزرعة وفى البناء، وكمان كنت بربى بنتين، وكنت أنا الأب والأم فى البيت، وعمرى ما اشتكيت لحد، وكانت أصعب فترات حياتى وقت انفصالي عن زوجى، وأنا اللى رفعت الدعاوى عليه، وكنت بترافع فى المحكمة، ودى أصعب فترة فى حياتى".
وقالت الأم المثالية على مستوى الجمهورية، "أنا عمرى فى حياتى ما فرحت الفرحة دى، الحمد لله ربنا كافئنى والتكريم ده أدانى دفعة معنوية أكتر من أى حاجة تانية، وأنا فرحانة كأنى متعبتش يوم فى حياتى".
وأضافت فاطمة سيد أحمد، أنها كانت تساعد والدها فى البناء من وأنا صغيرة، متابعة، "علمنى الرجولة والشهامة والحنية، وكان بيقولى خليكى في مذاكرتك خليكى فى حياتك، وأنا اللى كنت برفض وأقوله لازم أكون جنبك وأساعدك، وأنا حبيت الشغلانة دى لقيت نفسى فيها، وكسرت الحاجز بين الراجل والست، الست ممكن تعمل كل حاجة زى الراجل ويمكن أحسن".
وكانت عقدت الدكتورة نيفين القباج، وزيرة التضامن الاجتماعى، مؤتمرا صحفيا لإعلان أسماء الأمهات المثاليات لعام 2021 على مستوى محافظات الجمهورية، وذلك وفقا للمعايير والشروط الموضوعة من قبل اللجنة المركزية المشكلة من ممثلي الجهات المعنية، حيث تقدم لهذا العام 496 أمًا للاشتراك بمسابقة الأمهات المثاليات على مستوى المحافظات لكل واحدة منهن قصة كفاح تستحق التكريم، ومن بينهن 305 متقدمات انطبقت عليهن الشروط.
تم أضافة تعليقك سوف يظهر بعد المراجعة