امسك ورقه وقلم ، واشرح اللى جواك بدون خجل، وإوعاك تخاف من الندم إنك شكيت فى يوم للورق، ماهو ياما شكيت للبشر وسرك بقى علن، دا رب البشر سامع ومطلع، سامع أنين قلبك اللى بنسميه وجع!!
رب الشيء أولى بالشيء فاللى خلقك رب كل شيء.. ارجعله بنفسك الضعيفة هو اللى خلقها وقادر يقويها.. سيبك من الورق دا مصيره هيتحرق.. والبشر سخيفة جرحك بالنسبالهم نكتة جديدة.
ربك خلقك وأبدع فيك وعالم صبرك أخره فين، وعلى أد قدرتك بيديك شيلتك بالنسباله تقيله مهما كانت فى عين البشر سخيفة ماهو عايز يكافئك بمكافئه جميلة، آسف يا رب ارتكبت خطايا كبيرة، كل ما أقول التوبة أرجعلك بذنوب ذي الحمولة.
بس أنا طمعان في رحمتك يا رحمن وطمعان فى عفوك يا عفو يا غفار وطمعان في كرمك يا ذو الجلال والإكرام
ياه يا رب بعد دا كله بتسامحنى ؟!
بعد دا كله بتكرمنى وتوفقنى ؟!
خجلان من كرمك يارب مش طالب منك إنك تهدينى وعلى صراطك المستقيم تمشينى ،وفى جنات الخلد ومع الأبرار يكون نصيبى،وإسقينى من يد حبيبك المصطفى، وبوجهك الكريم يكون الملتقى.
تم أضافة تعليقك سوف يظهر بعد المراجعة