الرئيس السيسي من قلب الصعيد: "عاوز أفضل خدام لله والناس لحد لما أمشى".. ويؤكد للقطاع الخاص: مشاركتكم فى المشروعات توجه دولة.. وما فيش مزاحمة "إحنا أسرة واحدة".. اللى اتعمل فى البلد ما يتعمل فى ظروفنا وقدراتنا

الأربعاء، 22 ديسمبر 2021 03:55 م

الرئيس السيسى

كتب سمير حسنى – محمد عبد العظيم - محمد عبد المجيد

اضف تعليقاً واقرأ تعليقات القراء

الرئيس السيسي معلقا حول ما أثير عن مشاركة القطاع الخاص: حصل كلام بقدره لكن كلنا مع بعض وعارفين حسن النوايا ومحدش عنده نوايا غير طيبة لمصر

الرئيس السيسي: "فيه شركة خاصة أخدت 75 مليار جنيه في 7 سنوات.. ازاى مش بتشتغل؟"

الرئيس السيسى: نعوض أصحاب الأراضى الزراعية بسعر عادل حال توسعة الطرق

الرئيس السيسي: "4500 شركة تشييد أخدوا 1.1 تريليون جنيه فى 7 سنوات"

الرئيس السيسي: "التخلف" أسبابه الجهل والفقر وقلة الوعى

الرئيس السيسي: محطات الغاز الطبيعى متاحة الآن بجميع المحافظات

الرئيس السيسي: مشروعات جهاز الخدمة الوطنية متاحة سواء للبورصة أو المشاركة

الرئيس السيسى: "ننفذ مشروعات ضخمة لنربح رضا ربنا ورضا الناس"

شدد الرئيس عبدالفتاح السيسي، على أهمية مشاركة القطاع الخاص فى المشاريع القومية، داعيا إياهم للتوسع فى المشاركة بعدة قطاعات وأبرزها القطاع الزراعي، مشيرا إلى أن مشروعات الخدمة الوطنية متاحة للطرح فى البورصة والمشاركة أيضا مع القطاع الخاص.

وتحدث الرئيس عبد الفتاح السيسى، قائلا: "عمر ما روحى المعنوية تأثرت.. التحدى شايفه من 20 و25 سنة.. ومش جديد عليا.. محتاجين كلنا نكون شايفين زى بعض ونتحرك فيه زى بعض".

وأضاف الرئيس السيسى: "كنت بتكلم مع الزملاء فى الحكومة عن حجم المشاركة اللى القطاع الخاص دخل فيها.. وانا هنا بتكلم على مشروعات بنية أساسية مثل الكبارى والطرق والتشييد والبناء.. وكنا بنراجع الأرقام.. في الفترة الى توليت فيها المسئولية.. وهعلن عدد الشركات .. الكلام لينا كلنا.. لكل الناس.. مش للحكومة والإعلام.. لكل الناس.. هقول رقم نحفظه 4500 شركة.. العدد بالظبط 4375 شركة اشتغلوا .. 150 شركة اشتغلت حد أدنى مليار جنيه.. وحد أقصى 75 مليار جنيه.. بنتكلم فى تريليون و100 مليار".

وتابع الرئيس السيسى: "بكلم الناس اللى بتقول فيه فرصة للقطاع الخاص.. طبعا فيه فرصة والله مش بقول كده وخلاص.. نتمنى أن القطاع الخاص يساهم فى كل شىء.. ومش تمنى كلام لا.. نتمنى ونشجع.. كل المشروعات.. وحتى المشروع اللى يتم افتتاحه اليوم أهلا وسهلا بالقطاع الخاص.. اللى احنا دفعناه تدفعه القطاع الخاص وتبقى معانا.. مستعدين القطاع يشارك بالنسبة اللى عاوزاها".

وأكمل الرئيس السيسى: "4500 شركة خدوا ألف و100 مليار جنيه.. الـ 4500 شركة دول فيهم حوالى 3-4 ملايين أسرة وبنتكلم في 15-20 مليون إنسان.. بقالنا 7 سنين الشركات دى شغالة.. والمواطنين اللى فيها شغالين.. بنتكلم فى طرق بالشركات دى مش بحد تانى".

وتطرق الرئيس عبد الفتاح السيسي، عن قطاع الصحة في الصعيد قائلا: "خلال الفترة الماضية لما اتكلمنا عن مبادرة حياة كريمة، التأمين الصحى الشامل 15 سنة، وبعدين قولنا نكون طموحين شوية ونخليها 10 سنين، ولما قولنا حياة كريمة، نجهز البنية التحتية المطلوبة سواء كان مستشفى أو مراكز صحية.. وبرنامج التأمين الصحى الشامل هياخد وقت أكثر من كده.. مر منه 5 سنوات سنتين في بورسعيد في محافظات الصعيد ومحافظات أخرى و3 سنين لإنهاء الموضوع".

وأضاف الرئيس:"الدولة بكم تبذل جهدا كبيرا.. وكله بتوفيق ربنا لينا.. دايما في كل مناسبة هفضل اكرر الحمد والشكر والثناء العظيم لله سبحانه وتعالى أنه قدر يوفقنا ومكنا.. اقدر اقول بتواضع شخصى وحتى باسم الحكومة اللى اعمل مايتعمل والله والله والله ما يتعمل لا ظروفنا وقدراتنا الاقتصادية علشان حتى الأمور واصلة.. ومش نقول علشان نبقى فرحانين.. أو الطموح يبقى أكثر روحنا المعنوية ترتفع".

وقدم الرئيس عبدالفتاح السيسي، التحية والتقدير لجميع المصريين وبصفة خاصة مواطني الصعيد، وقال الرئيس: "كل التحية والتقدير لأهالينا بصفة خاصة في الصعيد ولكل المصريين ، ده يوم من مجموعة أيام هنخصصهم لافتتاح المشروعات، التي تم الانتهاء منها في الصعيد".

وأضاف الرئيس السيسي:"بنتكلم عن مشروعات هنفتتحها النهاردة ومشروعات هيتم الإعلان عنها وهنفتتحها خلال الأسبوع، وده بيأكد حرص الدولة على تجاوز كل المشاكل والصعاب والتحديات التي كانت موجودة في الجمهورية بصفة عامة والصعيد بصفة خاصة، وكان نصيب الصعيد من التنمية أقل من باقى محافظات الجمهورية، اللى بنعمله هنا بنحاول نخلى الدولة كلها على نسق وخط واحد ميبقاش فيه منطقة بتتفوق على منطقة أو محافظة بتتفوق على أخرى، واللى هيكمل ده موضوع حياة كريمة هيغطي كل المسائل، وإيه الجهود اللى بتتعمل في إطار الفكرة ومشروعات الصعيد اللى هنفتتحها خلال الأسبوع".

وأكمل الرئيس: "بقول للمصريين أن حجم الجهد اللى بيبذل وقلت كذا مرة مكونتش ببالغ ما تم إنجازه في سبع سنوات يتعدى سنوات طويلة جدا من العمل والإنفاق.. بنتكلم في ارقام ضخمة جدا تم ضخها لصالح مجابهة ، وعلشان يحقق طموحاتنا واحلامنا فيما يخص التنمية والبنية الأساسية والتعليم وكل ما نتمناه في مصر".

وتساءل الرئيس: "هل موضوع الجهد حتى بعد ما نخلص حياة كريمة هيقف؟ لا، حركة التطوير والجودة والرفاهية تتطلب الاستمرار في العمل وتحسين ما لدينا ونضيف اليه اكثر.

وأضاف الرئيس: "عندنا إشكالية بقول عليها دايما "التخلف" أو متاهة التخلف، وبعتقد أن المتاهة دي أسبابها الجهل، والفقر، وقلة الوعي، وبالمناسبة التلات حاجات دول ليهم تاثير متبادل، مش هنقدر ابدا محاربة الجهل إلا اذا كان لدينا قدرات اقتصادية وبالتالي جودة التعليم تحتاج جهد آخر".

وقال الرئيس عبدالفتاح السيسي، إن محطات الغاز الطبيعي أصبحت متاحة الآن في جميع محافظات مصر.

وعقب الرئيس السيسي على كلمة المهندس طارق الملا: "كانت هذه المحطات موجودة فقط في 7 محافظات، والآن مستعدون لتوفير الغاز من خلال محطات الغاز".

وشدد الرئيس عبد الفتاح السيسي، على أهمية مشاركة القطاع الخاص فى المشروعات القومية، مضيفا: "حبيت اسمعكم إن احنا بنقول يا جماعة اللى بيعمل فى مصر شركات مصرية قطاع خاص.. وبدعوهم من فضلكم.. خشوا فى مجالات أخرى.. انتم حققتم أرصدة وقوائم مالية كويسة.. خشوا فى مشروعات أخرى لدفع عجلة الاقتصاد وبنشجع ده ومش بنشجع كلام".

وأضاف الرئيس السيسي: "قلت الفدان بيتكلف 300 ألف جنيه أحيانا، إذا كان حد في القطاع الخاص مستعد.. إحنا خلال سنتين هيكون عندى 2.5 مليون فدان تتكلف 500 مليار جنيه.. إذا كانوا مستعدين يخشوا هكون سعيد علشان الأموال دى هيتم ضخها فى مشروعات أخرى.. ديروا عملكم وازرعوا للبلد.. أى مشروع هعرضه عليك "منتهى" مش مشروع هنفكر فيه.. دراسات الجدوى بتاعته والإجراءات التنفيذية اتحطت وتم تنفيذ المشروع على الأرض وبيتعمل.. مش هقولك ساهم أو اشترى مشروع هتعمله أنت، بقول كده ليه علشان أقولك محتاجك معانا، وينطبق هذا الكلام على كل المشروعات.

وأكد الرئيس السيسي، أن مشاركة القطاع الخاص هو "توجه دولة"، موجها حديثه للقطاع الخاص، قائلا: "محتاجينكم وعاوزينكم تشتغلوا معانا.. بس بلاش نعمل انطباع على إن فيه مزاحمة أو رفض.. لأ.. لأ.. لأن حجم العمل المتاح والمطلوب كبير جدا".. مشروعات جهاز الخدمة الوطنية متاحة سواء للبورصة أو المشاركة.. أى مشروع اتعمل زى ما الكتاب بيقول".

وأضاف الرئيس: "مش هتجد فيه حاجة ناقصة.. تسويات أرض وشبكات رفع مياه ومد مياه حتى المحوريات وشبكة الكهرباء والطرق.. توشكى وشرق العوينات 99% تم الانتهاء منها وشغالين فى شرق العوينات الفرافرة لخدمة زراعة ما يقرب من 1.5 مليون فدان، إحنا جادين قوى فى مواجهة تحدياتنا والتغلب على ما نحن فيه.. بنقاتل ما نحن فيه للخروج منه.. وبفضلك يا رب هنخرج من اللى إحنا فيه لـ "اللى إحنا بنتمناه لنفسنا وبلدنا".. ومفتكرش إن حد هدفه الإصلاح والبناء والتنمية إلا لما ربنا بيسدد خطاه.

وتابع الرئيس: "يمكن اتكلمت عن القطاع الخاص علشان حصل كلام قبل كده بقدره.. لكن كلنا مع بعضنا.. عارفين حسن النوايا ومحدش عنده نوايا غير طيبة لمصر بس تبقا الأمور نوضحها أحيانا".

وقال الرئيس عبد الفتاح السيسى، أن أحد شركات القطاع الخاص والتي تعمل في قطاع التشييد قد حصلت على استثمارات تقدر بـ 75 مليار جنيه في 7 سنوات أي أن كل سنة تقدر بـ 11 مليار جنيه، متابعا: "فيه حد بيشتغل بـ 11 مليار جنيه ويقول مش بيشتغل.. ازاى؟!".

وأضاف الرئيس السيسى: "عندنا 100 ألف فدان أو 200 ألف أو نص مليون فدان زى الكتاب ما بيقول.. رى وكهرباء وطرق.. وكل حاجة.. مقدرشى أقول للمواطن اللى بيزرع قمح أقوله سلم قمحك.. بنعمل مليون فدان يوفروا 3 ملايين طن".

وأكد الرئيس عبد الفتاح السيسى، أن الدولة المصرية تحتاج إلى 2.1 مليار دولار للقمح سنويا، متابعا: "لما نعمل مليون فدان من أجل الحياة والزراعة يحتاجوا 200 مليار جنيه.. المليون فدان دول جاهزين مش محتاجين حاجة.. اللى ياخد منهم يرمى البذرة ويشغل مكن الرى ويشتغل.. ليه التكلفة دى علينا لأنها أمن قومى".

وأضاف الرئيس السيسى: "ارجو أن النقطة دى ننتبه لها.. فيه مشروعات من الاقتصاديين مش بيشتغلوا فيها.. ومن حقهم كده.. ده صاحب مال ومصلحته انه يدور على القرش اللى بنفقه ويكسب منه.. لكن الأمن القومى نصرف فيه.. بعيدا عن المنظور الاقتصادى.. المليون فدان عوائدهم قد ايه هيشغلوا قد ايه.. لو المليون شغلوا واحد ولا نص يعنى نص مليون فرصة عمل.. وزيادة معدل النمو.. مليون إنتاج في زراعة أو زراعتين في السنة.. وهتاخد عليهم ضرائب".

وتابع الرئيس السيسي: "احنا اسرة واحدة.. مصر والقطاع الخاص والحكومة.. كلنا واحد.. محدش يقول انت وانا.. واحنا طبيعي أكون صادق علشان ربنا هيحاسبنى.. التحديات الموجودة في بلدنا.. يا جماعة البلد هتقوم بينا كلنا.. وفهمنا كلنا وايدينا مع بعض".

وتحدث الرئيس عبد الفتاح السيسى، عن إنشاء 14 محورا جديدا على النيل في الصعيد، متابعا: "قبل سنوات ولما كنا نستعد لهذا التطوير كانت المسافة الجانبية بين المحاور 100 كيلو والهدف أنه يكون 25 كليو متر فقط.. بفكر كامل الوزير.. احنا النهاردة وصلنا الرقم ده بالعمل والخطط والموارد.

وأضاف الرئيس السيسى:"مفيش طريق يتم توسعته بجانب الأرض الزراعية إلا بعد تعويض أصحاب الأراضى الزراعية.. هذه الأرض الزراعية نعطى تعويضا بسعر عادل للناس.. رغم انه منفعة عامة.. ومش هنقول للناس شيلوا معانا.. بنقول رغم أنه قلبنا بياكلنا أننا ندخل في أرض زراعية علشان توسعة الطرق. بس مفيش خيار تانى وبندفع تعويضات للناس".

وتحدث الرئيس عبد الفتاح السيسى عن تطوير الطريق الدائرى، قائلا: "زى ما بنعوض أصحاب الأراضى الزراعية بنعوض المناطق السكنية.. دخلنا الطريق الدائرى وفيه 2100 عمارة اتشالوا.. ما يطلع من شقته بياخد التعويض المناسب.. حد يقوله سيبها.. طب ازاى وحجم النمو المطلوب للحركة يحتاج ده.. ولو فيه تنمية واستثمارات.. بس مش على حساب الناس.. لا.. دول اهلنا".

وأضاف الرئيس السيسي: "خلال السنوات الماضية الناس كانت سابقة الدولة ولما سابقت عملت اللى عايزه أو اللى الظروف اضطرتها تعمله.. ومش قولنا الناس تشيل ثمن الإصلاح.. الدولة تشيل ثمن الإصلاح.. ده أمر حريصين عليه".

وتابع الرئيس السيسى: نعمل على توسيع القدرة الحركة الأساسية في الطرق.. مثل القاهرة التاريخية.. اخر عرض للدكتور مصطفى مدبولى رئيس الوزراء بيتكلم 210 ألف وحدة بـ 100 مليار جنيه.. علشان احنا مش نسيب أهلنا في الحالة اللى موجودة بالتجمع العمرانى لا... ده اقتصادى .. لا والله.. هنربح منه حاجة واحدة.. هنربح منه رضا ربنا ورضاكم يا ناس.. ونشغل فيه تشغيل لحد ما الصناعة تنطلق وتوفير فرص العمل".

ووجه الرئيس عبد الفتاح السيسي، الشكر إلى الحكومة قائلا: "لما بشكر الحكومة.. أصل في الجلسات بتاعتنا بيتألموا منى غصب عنى.. زى ما قولتلكم أنا مش بشوف اللى مش بيخلص.. معرفشى العمر يدينى ولا ايه.. عاوز اخلص كله.. حبى للناس وعاوز افضل خدام لله والناس لحد لما امشى.. ربنا يوفقنا".

وأضاف الرئيس السيسى: "عندى مشاريع تشغل الناس في 4500 شركة أفضل من كده.. حتى الآن لا .. في الزراعة.. لا هل ده العائد بتاعه زى ما يكون الصناعة والاتصالات لكن هتاخد اكثر ومرحلة نشتغل عليها.. تحياتى لكل للى اشتغل وادى ويؤدى".