"تامر"، ابن البلد الشاب الجدع اللى خد من عمره وقت كبير سخره للحيوانات الضالة فى الشوارع، ينزل يوميا فى ميعاد معين اتفق عليه الإنس والحيوان لإطعامهم وعلاجهم أيضا من الأمراض التى تظهر عليهم من جرب أو أمراض جلدية أخرى أو أمراض معدية.
ويقول "تامر"، "بنزل كل يوم من بيتى على الشغل وبمشى من الشغل الساعة 3 علشان أطعم الحيوانات الضالة لأنهم أهلى وعزوتى بلف فى كل الشوارع أحطلهم الأكل بتاعهم وبعدها برجع الشغل تانى أكمل حياتى طبيعى".
وتابع "بحس براحة نفسية لما بعمل كده وببقى أسعد إنسان فى الكوكب حقيقى وأنا بخدمهم وبقدملهم الأكل، وساعات بحس إنهم بيكلمونى واللى بلاقيه تعبان فى أى شارع وأنا بلف أأكلهم باخده إن كانت قطة أو كلب وأحطها فى الحوش بتاعنا فى المقابر وأعالجهم وبجيبلهم أدوية من الصيدلية وبمشى معاهم على بروتوكول دوائى لحد أما يخفوا".
وأردف "عانيت كتير بسبب علاجهم لأنى ماكنش عندى خبرة كافية فى العلاج، بس خدت كورسات على إيد صيدلى هنا وكنت بشوف هو بيعمل إيه وبقيت أعمل زيه علشان تكلفة علاجهم كبيرة مش قليلة".
تم أضافة تعليقك سوف يظهر بعد المراجعة