عمرو أديب يؤكد إنفاق الدولة رسوم التصالح فى توصيل المرافق للعقارات المخالفة

علق الإعلامي عمرو أديب، على القرارات الخاصة بتحصيل غرامات على مخالفات البناء، وقال: "أنا عاوز أقول أن الأصل في القصة دي مش لم الفلوس، رغم أن الفلوس مهمة ولها أدوار مهمة في القصة دي، لكن الأصل هو منع البناء المخالف، والناس لازم تعرف أنه دفع الرسوم دي أو الغرامات دي معناها أن البيت ده ملكك ومن حقك، إنما الناس المخالفة دي لا عارفة تورث البيت ولا تأجره ولا تبيعه".

وأضاف عمرو أديب، خلال برنامج الحكاية الذي يذاع على قناة mbc مصر: "الدولة عاوزة المواطن سعيد ومرضي، وياخد حقه والدولة برضه تاخد حقها، وبالنسبة للفلوس اللي بتتلم دي، هي ثمن المرافق اللي حضرتك يا عم المخالف عاوزها توصلك وأنت أصلا مخالف، مش هتاخدها الدولة في حسابها، مع الأسف ده حصل في العقود اللي فاتت بسبب فساد بعض الموظفين وبعدها حصل ضغط على الدولة وانفلات في أعقاب 2011 وزادت نسبة المخالفات".

وقال: "أنا كمواطن عاوز حاجتين أني اتعامل معاملة جيدة، وأنه ميبقاش في مغالاة في الفلوس اللي أنا بدفعها، وعشان كده المحافظات عملت على تنظيم عملية التصالح وخفضت كمان في الرسوم المدفوعة في الموضوع ده، والشهر العقاري لا يمكن تسجل فيه حاجة مش موجودة".