كنت ف سنى بحلم إني
أعيش مبسوط
وأعشق فنى وأفرح أغنى
بعلو الصوت
كنت بنادى وأقول يابلادي
فداكى يا أمى لحد ما أموت
كنت صغير طولى قصير
كنت بعانى من التفكير
طول الوقت البال متحير
كنت بخاف من التغيير
كنت بنام والدمع ف عيني
وأبويا يجينى ويصحيني
عشان مبكيش
ياخذنى ف حضنه ويدفيني
ويسأل مالك أقوله مفيش
يبدأ يحكى ويكلمنى ويعلمني
إزاى هنعيش
إدعى وصلى واصبر يابني
إنت أكيد ليك لؤمة عيش
كان ويايا بيطمني
ويخلينى أنام بشويش
وأصبح أسافر فى الدنيا واعافر
ممكن أغير فى الظروف
وأمسك فيها بسرعه ألاقيها
ترد عليا إستنى شوف
ألمح فيها حنان وأتاريها
دنيا يسكن فيها الخوف
وأبويا يموت
وف لحظه سكوت
دنيا ونبوت على اكتافي
والحِمل يزيد والنار بتقيد
وأنا بالتأكيد هكون وافي
وعشت حزين وبعد سنين
أخويا يموت شهيد ف كمين
والحمل أهو زاد فيلم بيتعاد
ولسه سواد فى الدنيا وطين
الحزن ماضى معايا عقود
من غير شروط أو حتى شهود
أقسم لى إنه يكون معقود
والحبل بيننا يكون مشدود
إبنى اللى كان أملى وخيري
راح منى بيربيه غيري
ومسيره يرجع آه ومسيري
أكون ف حضنه قبل ما اموت
الدنيا ف لحظه بتتغير
وتخون كل محبيها
والعمر لو طال ده قصير
بيصيب كل اللى عليها
أكيد لكل بداية نهاية
ولكل قصة رواية وحكاية
وحكايتى فى الدنيا مراية
مكتوب عليها مفيش هروب
كنت ف سني
تم أضافة تعليقك سوف يظهر بعد المراجعة