قفلنا الباب وشطبنا ولمينا ف ضفايرنا
واستغفرنا لذنوبنا عشان ترتاح ضمايرنا
وبطلنا تعاطي كلام بطعم المن والسلوى
وخفينا من الإدمان لضحكة عينك الحلوة
للونها المحترف إجرام
طبطبنا على جراحنا، كتمناها بحنضل خام
وارتحنا وريحنا وكل أمورنا ماشية تمام
رجعنا تانى للدستور وطبقناه كما أنزل
كفينا شرنا بخيرنا
وتوتة توتة يا احلام
وسيبناك تحدف الشبكة وترزق من عيون غيرنا
وشفناك رامي ع المينا حكاوينا، خطوط سيرنا
وماسك دفة الوصل ال كات بينا، وبتحود
بردنا وجوعنا وتعبنا فى بعدك لجل نتعود
مشينا وضهرنا محني من الذكرى، طريق آلام
وظلم الهجر حاربنا، قتلنا بيك، ف شهر حرام
وفرش سريرنا من صخرة، ضوافرها، عتاب وملام
تقطع في دفاترنا
وترميها في وش الصبر
وكنا فوق شفا حفرة بتسحبنا تجاه القبر
كتير كنا بنتوجع
مالقيين حد بيجيرنا
ولا يسقينا من إيده، ولا يعالج جفاف بيرنا
وعشنا وكله بيعدي
ودلوقتى انا مسمحاك
هتيجي ازاي ونتحمل نعيش تاني الفراق وياك
بلاش العودة م الأول ياريت ترجع
بنترجاك
