أنا أم الشهيد يوم ولدته يوم فرح وكان بالنسبالى عيد
حمدت ربى واستخرته وسميته وليد
كان ابن فوق المعتبر طيب قوى شهم وحميد
زرعت فيه كلمة وطن حب البشر ويكون زهيد
أنا أم الشهيد
أنا اللى ربيت وشلت وداديت ذاكرت ودويت
لحد ما زرعتى كبرت وبقى عندى راجل شديد
وقالى يا أمى إسمحيلى أكون ضابط
أحمى الوطن وأكون سند ليكى ولكل بيت
قمت بكيت
قالى ليه لو كل أم بكت طب والوطن مين يفديه
حسيت بنفسى صغيرة قدام وليدى المعتبر
هللا عليه
ويوم تخرجه طلت بطل نظرت أسد
ورقبتى كانت فى السماء وفرحت بيه
أنا أم الشهيد
يوم جوازه زغروته حلوه ودمعه فره
غصب عنى سنة حياة
شلت ابنه خته فى حضنى ما شاء هللا
وفى يوم صباحه رن الجرز قلبى انقبض
وليد ليه جيت
قالى يا أمى حضنك وحشنى وأكسبلى دعوة وأبوس الإيد
قلتله روح قلبى وربى رضيين عليك
وفى تانى يوم جالى الخبر
ابنك طاله غدر البشر
إرهاب خسيس موت بطل
وراح فدا تراب الوطن
قلبى انفطر
زهرة شبابى عمرى وحياتى
زرعى وحصادى
صبرنى ربى لفراق وليد
وعزائى انه حياً خليد
وديه حكايتى
أنا أم الشهيد
تم أضافة تعليقك سوف يظهر بعد المراجعة