الأمومة مش بطن كبرت ولا سالوبتات بينك وجينز على كوتشى أد كفك وتيشرت عليها باتمان ولا عربية فيها بيبى طول الليل سهران ! الأمومة مش حنسمى ايه ولا شعرة طلع لونه ايه ولا حلوة زي مامتها ! الأمومة خلف الكواليس غير اللى بنشوفها في عزومة على غدا في تشيليز ولا سهرة في فرح بفستان سواريه .. الأمومة مش زى ما بتشوفها في كارفور ولا ديزينيا مول ..
الأمومة خلف الكواليس في منبه بيرن الساعة 6 وعين مش بتغفل قبل الساعة 2، الأمومة في طبق رز عليه بامية و طبق سلطة لو مكلتوش مَش حتاخد مصروف ! الأمومة في إيد عالكلاكس بتوسع عشان تلحق التمرين وتدهن بليل في الكريم عشان شد العضل متين .. الأمومة بتتدفى في حضن ولادها في عز البرد و تحط بإيدها كمادات ساقعة للعيانين ! الأمومة كيكة بتبوظ فتجرب تانى و تالت طريقة مين و لا مين الأمومة بتبكى ساعات بليل و تصحى جواها أمل كبير !
الأمومة ورق و مذاكرة كتير و ورشة تلوين، الأمومة حاجات كتير حب واحتواء وحب الغير .. الأمومة حضن كبير الأمومة احتواء للصغير والكبير في أمهات كتير مخلفوش بس احتووا وكانوا كتف ودهر وسند وأمان، الأمومة احتواء احتوائك لصديقة في عز ضيقتها أمومة وحنيتك على زوجك وخوفك عليه، أمومة احتواء أختك ليكى أمومة القطة اللى بتربيها أمومة، ده انا ساعات بحس في حضن بنتى ليا إنها أمى، ويكفي أن نطمئن بأن " الجنة تحت اقدام الأمهات".
تم أضافة تعليقك سوف يظهر بعد المراجعة