القارئ أحمد رجب الكُعباري يكتب : على رمش عيون الليل

على رمش عيون الليل سهران..

بسمع حواديت الأيام..

وغناوي بصوت مليان أشجان..

وبُكى وآهات..

وسكات وكلام..

وكأن الليل مجروح عيان..

قالوا الليل بيموت يا ولاد..

ونروح فين ونداري الدمع..

هنفضح حالنا في وسط الخلق..

ولا نطوف بلاد وبلاد..

ليه وازاي ولمين الحق..

يشوف الدمع مالي العين..

وأنا واقف بذهول أتفرج..

على وجع الأيام في الناس..

ناس فرحانة وناس بتهرج..

ناس تانية الهم مالكها..

من ساسها لحد الراس..

قالوا يا طبيب إلحقنا..

الليل بيودع أنفاس..

 وإنت البركة فـ إيدك جارية..

إعمل حاجة إلحقنا استرنا..

استر عين الدمع ماليها..

استر روح الحزن كاويها..

قومت مطلع ورقة وكاتب..

دوا خلصان مـ الأكجزخانات..

مع كام جرعة إبتسامات..

ورجعت مكاني من تاني..

والدمع فـ عيني ناداني..

وبكيت والهم في قلبي..

نار تجري بدل الدم..

طبيب بيداوي الهم..

ولا عارف مين يداويه..

طبيب حافظ صم..

إزاي هيواسي الناس..

ولا حدش جنبه يواسيه..

سمعت صوت بينادي..

إلحق يا طبيب..

إلحقنا أوام..

أنا كنت يادوب..

لسه هنام..

يمكن أغرق في الأحلام..

وأشوف نفسي فـ أحلى منام..

إلحق يا طبيب..

إلحقنا أوام..

مافيش دوا في الأجزاخانات..

ما أنا عارف إنه مافيش..

أصل الروح دواها الروح..

ولا يشفيها أي طبيب..

الروح لو حبت ترتاح..

نراعي بعض شويا يا ناس..

ولما عزيز يحب عزيزة..

عزيزة متسوقش العند..

وتكابر وتقوله خلاص..

ولما فؤاد يحلم بالواد..

يشوفه عريس من العرسان..

يلاقي الخير مابين الأهل..

ولا الخير خلاص خلصان..

لما هنجبر خاطر بعض..

هنحس دايمًا بالناس..

وإن الكلمة الحلوة .. مش فرض..

بس الكلمة بتفتح باب..

وفي كلمة بتقتل قلب..

كلمة ترفعك لأعلي سحاب..

وكلمة تجيبك سابع أرض..

قومت طلعت لفوق البيت..

ورجعت على رمش الليل..

وفجأة وبدون علامات..

أو قلبة جو إو إستئذان..

أمطار بتمطر عـ الناس..

والفرحة بتعم الكل..

والكل بيضحك فرحان..

بالخير مـ الليل أهو عاش..

والكل بينشد ألحان..

فرحت الناس يا طبيب..

فرحت قلوب مساكين..

فرحت قلب حزين..

وفي وسط الضجة..

غمضت جفوني..

وقف المطر منزلش..

فتحت عيوني..

زاد المطر موقفش..

فاكرين المطر مـ الليل..

طب هيشوفوا فين..

ويعرفوا منين..

إن المطر هو دمعي..

جوا العين..!