تشربى ايه معاليكى
قهوة سادة ولا النسكافيه
اللى بيسهر عنيكى.
ده كان أسلوبى معاها
كنت شايفها أميرة القصر
اللى مفيش منها فى أى عصر
كنت شايفها الملكة
وكانت شيفانى كماليه
من ضمن كماليتها
زيى زى البرفان
أو نوع ساعة غالى من ساعتها
أصل قلب الراجل حجر
بس لو دق فثانية يتحول تراب
وأنا كنت لقلبها خفير
واقف بسلاحى ع الباب
سهران ويا الراديو
ع صوت الست أم كلثوم
وهى سهرانة تلمع فالهدوم
كنت لها نهر مفهوش غريق
وكانت لى الشوك
فى أى طريق..
قلبى عارف إنها مابتحبنيش
بس العشق ده نار
واللى جربه عارف إنه ما بيديش
أصل مفيش واحد فينه كاره إنه يعيش
ما بتحبنيش..
كنت بلبس أحلى هدوم عندى
وتسريحة شعرى اللى بتحبها
كنت بظبطها ع المرايا
وصورتها طابعها فى ميدالية
وتحت القميص شايلها جوايا
تكلمنى ع مزاجها وقت متكون مضايقة
أو فطريقها بتضيع وقتها معايا
وهى سايقه.
كنت شايفها حياه
وهى كانت شيفانى أراجوز
أنا أحبها أه تمام جدا
بس قلبها يحبني
لا طبعا لا يجوز
ما بتحبنيش ومتأكد
وبكل يوم أنا بتأكد
بس لسانى فعز الضلمه
بشوف شعاع عنيكي
شوفتى جرحك عمل فيا ايه
معاليكي.
تم أضافة تعليقك سوف يظهر بعد المراجعة