لميس الحديدى تكشف تفاصيل مكالمة عبلة كامل:"أنا مش مريضة.. ومستنية دور حلو"

كشفت الإعلامية لميس الحديدى، تفاصيل مكالمة الفنانة عبلة كامل يوم الأربعاء الماضى، قائلة: "يوم الأربع اللى فات جالى اتصال من عبلة كامل، وقومت نطيت من على الكنبة اللى كنت قاعدة عليها، أول مرة تكلمنى فيها، عندى أصدقاء كتير فى هذا الوسط لكنها أول مرة عبلة كامل تكلمنى".

وأضافت خلال تقديمها برنامج "كلمة أخيرة"، على فضائية "ON": "كلمتنى مدة 45 دقيقة، فيه حاجات أقدر أحكيها وحاجات لا بناء على طلبها، مردفة: "قالت: أنا سليمة ومش تعبانة خالص، وقالتلى أنا فرحانة جدا بحُب الناس اللى أنا شوفته، وساعات مببقاش مصدقة أن الناس بتحبنى كده وعمرى ما كنت أتصور إنى محبوبة من الجمهور".

وعن سبب عدم ظهورها قالت لميس الحديدى: "قالتلى أنا بحب أمثل بس، وأنا مبعرفش أعمل عبلة أعرف أمثل بس"، وعلقت الحديدى قائلة: "جملة واضحة ومهمة، هي ممثلة على الشاشة لكن في الحقيقة هي إنسانة وأم عادية جدا، بتبذل مجهود رهيب في شغلها ولكن مش قادرة تبذل كل المجهود دا عشان تظهر وتتصور".

وعن سؤالها حول اعتزالها: "قالت: أنا بحب التمثيل جدا ولو جالى دور حلو أكيد هشتغل، وقالت: أنها شافت مسلسلات رمضان اللى فات فيها حاجات كتيرة ومتنوعة ومفيهاش دور يناسبها، وقالت: "مفيهاش دور يستفزنى" وأنا مستنية دور حلو".

وتابعت لميس الحديدى: "دى رسالة لكل المنتجين ولكل الكتاب: عبلة كانت مستنية دور حلو".

وعن سؤالها حول حزنها من نشر شائعة مرضها:"قالت مش زعلانة ومسامحة كل الناس وأقول للى كتب الخبر شكرا إنك وريتنى حب الناس"، مردفة:"رسالة عبلة كامل: متشكرة لكل من بعتلى كلمة حب ونفسه يشوفنى على الشاشة، ومتشكرة للى كتب الخبر أنه وارنى حب الناس اللى يمكن مكنتش أشوفه".