خالد صلاح

نجم الكوميديا محمد هنيدى فى حواره مع لميس الحديدى: "بحب الزمالك واللى يشجعه".. وأحترم الأهلى.. يوسف شاهين قالى ماتبقاش بتاع لبن.. وكنت باكل ترمس على النيل وعملت دوبلاج 80 حلقة فى ديزنى عشان أجيب عربية بتكييف

الثلاثاء، 06 أكتوبر 2020 12:38 ص
نجم الكوميديا محمد هنيدى فى حواره مع لميس الحديدى: "بحب الزمالك واللى يشجعه".. وأحترم الأهلى.. يوسف شاهين قالى ماتبقاش بتاع لبن.. وكنت باكل ترمس على النيل وعملت دوبلاج 80 حلقة فى ديزنى عشان أجيب عربية بتكييف محمد هنيدى
كتب: بهاء نبيل

مشاركة

اضف تعليقاً واقرأ تعليقات القراء

كشف النجم محمد هنيدي خلال لقائه ببرنامج "كلمة أخيرة" الذى تقدمه الإعلامية لميس الحديدي على قناة ON، عن العديد من الأسرار والحكايات الخاصة منذ بداية دخوله الوسط الفنى حتى الآن، وتفاصيل أول مشهد قدمه، وغيرها من الأسرار المشوقة.

فى البداية قال النجم محمد هنيدى خلال لقائه: "أنا بحب نهر النيل جدًا بعيدًا عن الجو الحلو والقعدة الحلوة ليا ذكريات معاه حلوة، خاصة أيام ما كنت عايش في إمبابة وأنا صغير وكنا بنشوف النيل قريب من البيت، وبروح أنا وأصحابى نذاكر هناك وقت الثانوية العامة.

وأضاف هنيدى، خلال لقائه في برنامج "كلمة أخيرة" تقديم الإعلامية لميس الحديدى، المذاع على قناة ON، شكل المراكب في النيل كان جميلا وكنت بتعرف على أصحابها وكمان صورت فيه كتير جدًا لما كبرت، وأكيد حبيت على النيل برده، وكنت باكل ترمس وحمص ودرة وتين شوكى، وأنا لسه على تواصل مع أصحابى في إمبابة وبروح أي مناسبة هناك وبشوفهم.

تابع، كنت أنا وعلاء ولى الدين وأشرف عبد الباقى روحنا مركب في المعادى نقعد لوش الفجر وواخدين الأكل وكل حاجة معانا وننام ونصحى، ولكن كان ليا موقف في النيل وقت تصوير فيلم "يانا يا خالتى" مع دنيا سمير غانم وكان النيل قلب فاجأة زى البحر وبقى في موج وسحب وتيارات، وأنا بعرف أعوم إلى حد ما ولكن كان في غواصين طبعا وكده

واستكمل، في فترة النيل كنت بلعب كرة قدم وكنت فاكر إنى هاكون لاعب كرة جامد، وروحت مدرسة كرة في الزمالك وكنت بلعب خط وسط، أما بالنسبة لموضوع إنى أكون محامى فكان والدى متخيل انى أكون محامى وكمان أنى أوصل أبقى وكيل نيابة، ولكن هما سنتين وسقط في الحقوق، لأن كل وقتى كان للمسرح فاتجهت للتمثيل.

كشف النجم محمد هنيدي أن المخرج العالمى الراحل يوسف شاهين هو من أول من تنبأ بمستقبله الفني قائلاً " أول حد قلي أني هبقى فنان كويس هو المخرج الراحل يوسف شاهين.. في فيلم " إسكندرية كمان وكمان"، حيث شاهدنا في مسرح الجامعة برفقة الفنان عمرو عبد الجليل الذي كان طالباً في معهد الفنون المسرحية لكنه كان يشارك في مسرح كلية الحقوق بالإضافة لـ خالد الصاوي وخالد صالح.

وأضاف هنيدى في لقاء مع برنامج " كلمة أخيرة"، الذي تقدمه الاعلامية لميس الحديدي على شاشة " ON" قائلاً "شافني يوسف شاهين واختارني ضمن أشخاص وشاركت في فيلم "إسكندرية كمان وكمان " "بمشهدين"

 واستذكر هنيدي ذكرى عزومة عشاء دعاه إليها المخرج الراحل يوسف شاهين أثناء تصوير فيلم " إسكندرية كمان وكمان "  قائلاً " في يوم من أيام التصوير قال لفريق العمل ماتروحوش أنا عازمكم على العشاء، وقلي قدام كبار النجوم ومنهم يسرا.. ولد  أنت كمان معزوم وكنت فرحان، وجلست أمامه على المائدة  وإحنا بناكل سألته؟  ياأستاذ أكمل ولا ؟  فرد قلى أنت هتبقى فنان كويس سينما ومسرح وكل حاجة بس ماتبقاش " بياع لبن " فسألته يعني إيه؟، فرد عليا وقال "مش كل إستوديو تروحه وخلاص ماترطرطرش فى الأعمال من أجل الظهور فقط".

وأكد هنيدى، أن مأدبة العشاء كانت بداية صداقة قوية بينه وبين المخرج الراحل حتى رحيله عن الدنيا  .

 وكشف هنيدي عن الاجر الذي تقاضاه نظير قيامه بتاديه دورهفي فيلم " إسكندرية كمان وكمان " قائلاً " اخدت 400 جنيه وكانوا ساعتها رقم  مقارنة  بعقد  قمت بتقاضي نظير دوري فيه خمسين جنيه مع الفنان الكبير عزت العلايلي   كان إسمه " الحريق " قمت فيه بدور الحاوي  وكنت وقتها طالبا  في المعهد ".

قال النجم محمد هنيدى، إن طريق كفاحه في التمثيل بدأ من خلال مشهد مع فؤاد المهندس، وكان عبارة عن مشهد واقف فيه وفرعون هيعدى من قدامى فأقول له: "عاش الفرعون العظيم بس، وده لأنى كنت بوافق على أي مشهد بس المهم يكون قدام مين ومين المخرج زى أستاذ يوسف شاهين أو عاطف الطيب لأنه هايكون أفضل من بطولة فيلم لا يترك أثرًا.

وأضاف خلال لقائه في برنامج "كلمة أخير" للإعلامية لميس الحديدى، المذاع على قناةON: "وأنا صغير كنت بلعب كرة قدم وكنت فاكر إنى هاكون لاعب كرة جامد وروحت مدرسة في الزمالك وكنت بلعب خط وسط".

وتابع هنيدى خلال حديثه: "أنا زملكاوى من زمان من قبل ما أتجوز ولكن زوجتى أهلاوية، وأنا بالنسبة ليا اللى عاوز يشجع الزمالك هينبسط، وأنا بحترم اللى يشجع الأهلى، ولكن بجد أنا بحب الكرة جدًا، وبحب نادى الزمالك ولكن مش متعصب واللى بيلعب صح بسقف له".

قال النجم محمد هنيدى، من صغرى وأنا بحب الإذاعة والراديو، وجربت أشتغل فلقيت الموضوع ظريف وأنها حاجة جميلة أنك توصل إحساسك بصوتك من غير ما حد يشوفك، وده عملته من خلال دوبلاج أفلام الكرتون، وده حصل من خلال لايون كينج وتيمون وبومبا.

وأضاف خلال لقائه في برنامج "كلمة أخيرة" تقديم الإعلامية لميس الحديدى المذاع على قناة ON، لما نجحت دبلجة تيمون وبومبا، فأتعرض عليا من ديزنى إننا نعمل 80 حلقة وقلتلهم أنا هاعمله في 10 أيام فلم يصدقوا، وكان السبب في كده إنى كان نفسى أجيب عربة بتكييف عشان كان معايا عربية صغيرة ومفيهاش تكييف وكل ده عشان آخد الـ 10 آلاف جنيه بسرعة، وفعلاً خلصت المسلسل في 10 أيام وجالى واحد خواجة من ديزنى وقدملى شهادة تقدير.

وتابع، بعد ما عيشت 10 أيام في الحالة الكرتونية دى، ابتديت أتجنن وجالى حاجات كتير زى "شركة المرعبين"، وعملنا 5 مواسم من سوبر هنيدى، ودى حاجة بتبسطنى حاليًا إن كل رمضان بيكون ليا مسلسل، ولازم نهتم بالدبلجة الهجة المصرية لأنها مهمة جدًا.

قال النجم محمد هنيدى: "بحب السينما أكتر من التليفزيون لأن عنصر الوقت في التنفيذ أقل، لأن المسلسل بياخد 6 شهور، بجانب أن السينما لها متعة خاصة، ولكن بين الوقت والأخر لازم الواحد بيشتاق أن يطل على الناس في البيوت.

وأضاف خلال لقائه في برنامج "كلمة أخيرة" تقديم الإعلامية منى الشاذلى، المذاع على قناة ON: أنا خلصت تصوير فيلم "الإنس والنمس"، وشريف عرفة مدرسة كبيرة وشغله عبارة عن منظومة كل حاجة بتحصل في وقتها وكل واحد واخد باله من شغله بجانب أنه شاطر جدًا، ولسه متحددش وقت للنزول ولكن إن شاء الله يكون في إجازة نصف العام.

وعن وقت الحظر من انتشار فيروس كورونا قال: أكيد الكورونا بتخوف وكنا في الأول مانعين الخروج بالأخص في أول شهرين وكنا واخدين كل الاحتياطات، وكانت اللمة حلوة في أول 10 أيام ومبسوطين وبعد كده بقى ابتدع كل واحد في غرفته، لغاية لا ربنا وسعها ونزلنا بقى وسبناها على الله".

وتابع: ولادى بيقلدونى في التيك توك لكن مش بينزلوها، وأكتر حاجة عجبتنى منهم كانت لما عملوا مشهد خالتى نعيمة وحاجات في وش إجرام ولقيتهم إلى حدا ما دمهم خفيف.

يذكر أن برنامج " كلمة أخيرة " تقديم الاعلامية لميس الحديدي   ويذاع  من السبت إلى الثلاثاء  في تمام التاسعه  على شاشة  " ON".


مشاركة

اضف تعليقاً واقرأ تعليقات القراء



لا توجد تعليقات على الخبر
اضف تعليق

تم أضافة تعليقك سوف يظهر بعد المراجعة





الرجوع الى أعلى الصفحة