عرض برنامج "الحياة اليوم"، الذى تقدمه الإعلامية لبنى عسل، على فضائية "الحياة"، تسريبات جديدة للإخوانى حسين بدينى تفضح أيمن نور ومخطط المقاول الهارب لتخريب البلاد. وأشارت الإعلامية لبنى عسل، إلى أن الحوار دار بين الإخوانى حسين بدينى ومحمد علي، على صفحة محمد علي.
وقال الإخوانى حسين بدينى خلال التسريب: "كنت لغاية فترة قريبة جداً مراسل قناة الشرق فى ألمانيا وكنت لغاية فترة قريبة جداً مسئول الإعلام فى حزب غد الثورة بتاع أيمن نور، وكنت دراع أيمن نور اليمين فى ألمانيا، وهو لغاية فترة قريبة وحصل خلافات ومشاكل فى قناة الشرق نفسها، أنا انسحبت واستقلت وأعلنت ذلك بشكل علنى، ولو سألت عنى سامى كمال الدين، وهو صاحبى وحبيبى، وعارف التفاصيل دى بشكل أكبر، وانسحب وأصبحت علاقتى بأيمن نور مش كويسة خالص فى الوقت الحالى، وبصراحة عندى إحساس إنه مش جاد أوى فى موضوع الثورة ده، وحاسس إن هو بتاع مصلحة فى الأول والأخر، وعشان كده أنهيت علاقتى بيه ولست بأسف على ذلك".
وتابع: "بص يا زعيم، تامر أخصائى ومعالج نفسى زيى بالظبط واتخرج بعد دفعتى، وهو بيلعب اللعبة دى لعبة ثورية نفسية، وشخصية الجوكر أصلا مقتبسة من شخصية مرعبة مخيفة، ليها وجود فى السينما العالمية، كان فى فيلم مشهور أوى بيتقل ويفزع ويخوف ويرعب، وكل اللى هو غير راضى عنه، فهو اقتبس الشخصية دى على إنها مصدر رعب وفزع النظام ورائهم".
واستكمل: "بيعمل الماكياج مش عشان يخبى نفسه، والناس كلها عارفة هو مين، بس هو عشان يدخل المصريين فى الصور والشخصية والموضوع، وكأنهم بقوا جزء منه، ودا بيلقى الرعب فى قلوب النظام أكتر من إنه بيساعد فى التنظيم الثورى، هو بيلعب لعبة نفسية فى المقام الأول، وأنا شايف إنها مفيدة، صحيح فيه ناس مش بتفهم أسبابها، ليه الميكاب والماسك، ولكن ليها لعبة نفسية مهمة جداً بتؤتى أكلها، وأسلوبه فيه ناس كتير مش بيبفهموها، السلمية المبدعة الخشنة، وطبعا ميقدرش يقول نرفع السلاح وندافع عن نفسنا والكلام دا كله، وفى نفس الوقت لازم نأكد أننا مش هنستخدم الأسلوب الطرى اللى الإخوان بيستخدموه، سلميتنا أقوى من الرصاص والكلام دا كله".
وأردف: "بص يا محمد، بكلمك بكل صراحة، ظهورك مع وائل غنيم مكنشى ميزة كبيرة بالنسبالك، دا هو كده شدك معاه فى الطين، زى ما بنتكلم بالطريقة المصرية الحلوة بتاعتنا، وشكك ناس كتير أوى فى مصداقيتك، وائل غنيم كارت اتحرق خالص والبعد عنه دلوقت على الأقل، وخصوصا ظهر بالشكل المرضي اللى ظهر بيه، ابعد عنه خالص ومالوش أى تلاتين لازمة، وبهجت ليه شعبية ولكن ليه شطحات وبقاله 3 أو 4 سنين بيخرف يمين وشمال، وأنا بتفرج وبراقب من بعيد، وأنا معالج نفسى وشغلى إنى أسمع أكتر من إنى أتكلم، وشغل بهجت عمال يخبط فى جوكر وتامر جمال والكلام دا كله، وبهجت ليه متابعين كتير بس محتاج تصحيح مسار".
وواصل: "ياسر العمدة توأمى، مش جديد يعنى، ولما تتكلم مع حسين بدينى كأنك بتتكلم مع ياسر العمدة بالظبط، وكنا مع بعض فى ثورة الغلابة، وكنا مؤسسين الحركة، واللهم ثورة، وأنا وهو مؤسسين كل حاجة"، مردفاً: "أقولك حاجة أنا شخصيا شايف إن احنا فى مرحلة معينة، فيه فوبيا لدى قطاع كبير من الشعب المصري، حتى المتعاطفين مع الإخوان، بقى عندهم مشكلة مع علامة الصلاة والدقن، وشايف دلوقت إنه بلاش نزيد الطين بلة، ونبعد خالص عن الناس اللى حتى معانا فى الصف، ولهم كل التقدير والاحترام والقدسية مننا والمجهود الكبير اللى بيعملوه بس بلاش منهم دلوقتى".
واختتم: "ليا سؤال أهم، ايه هى الخطة أصلا اللى نحتاجلها، لما تلعب كورة بتحتاج خطة 443، أو433، أيا كان، وبناء عليه بتحط الخطة، ايه الخطة اللى عندك، انت فين ومين، انت كمحمد علي، أول ما ظهرت، أنا شخصيا عملته وعمرو أديب مسكه ودلس عليه، أنا كنت بتحرك من منطلق انك ظهرت ومعاك ناس في الجيش، وراك ناس على الأقل مش راضيين عن الوضع القائم فى مصر، وبناء عليه انتظرت أنهم يتحركوا حسب الظرف، والاحساس اللى وصلنا عن طريقة كلامك وثقتك، وانزلوا، وهم عاوزين عدد كبير عشان يتحركوا، واتضحك بعد كده أن مفيش تواصل كبير بينك وبين قيادات كبيرة في الجيش، والأولى من سؤال مين تانى يفيد؟، احنا عاوزين نعرف هنعمل إيه الأول، وإيه المعطيات اللى عندنا، وإيه الامكانيات المتوفرة لدينا ومين الناس اللى ورانا، والخطة بتاعتنا هتكون إيه عشان نقدر نشوف هنشتغل بمين ومع مين؟".
تم أضافة تعليقك سوف يظهر بعد المراجعة