فيسبوك
واتساب
برىء مظلوم
صحيح قلبى ف هواك مسكين
لكن رافض يكون سكين
ف إيد النسوة من حولك
ولا قابل يسيب الجب من قبلك
ف ليه تقطع حبال ودى
وانا اللي مادة ليك يدى
وبتمنى أكون دلوك
وبتمنى أكون الرؤيا والتفسير
وأكون الرد لو تسأل
مين فينا اللي كان يوسف
ومين اللي اترمى ف البير
وأقولك إن أنا أنت
أنا الكلمة اللى بتقولها
ولو حتى الحروف ساكتة
أنا العمر اللى طارح ليك
سنابل خير
وأنا المصلوبة من بعدك
وواكل من حنينى الطير
أنا اللى بس ليك وحدك
ولا عمرى هكون للغير
فمتسبنيش
بلاش تنسانى جوة الحزن أو متجيش
ولو حتى الأمانى عجاف
ولو لسة محبتنيش
بلاش ترمى على قميصى بحبّك كذب
بلاش ترميني من تاني ف قلب الجب
بلاش من دمعي ألون عيني واتكحل
ولو حبيت ف يوم تبعد
سلام الله عليك وارحل
أنا عمرى ما هنساك يوم
ولو شيفاك بعيني الديب
هتفضل جوه قلبي حبيب
لأن الديب ف قصتنا برىء مظلوم
