فيسبوك
واتساب
أنت فى الطراوة.. لا دا عايش فى العالم الموازى.. مش ها تقدر.. خليك جمب الحيط ولو تقدر خليك جواها.. لا دا عايش مع نفسه بقواعد كوكب المريخ.. أنت غريب ومبتعرفش تتطور.. خليك فى الجانب الآمن من حياتك بلاش مقامرة بيها!
مستغربين ليه مين مسمعش أى كلمه من دول قبل كدا طيب مين ماقالهومش لحد قبل كدا؟
مش مهم! الأهم حد فكر تأثيرهم أيه أو درس اللى قصاده مضبوط عشان يقوله أو يرضى يسمع منه الكلام ده!!
بتحكم عليا وبحكم عليك على أساس ايه! عشت حياتى أو أنا عشت حياتك نفس المعطيات هنا وهنا واحد؟
أنا فى الطراوة بس مش فاتح طراوتى عليك وعايش فى العالم الموازى مش العالم المتداخل فيك ومش ها أقدر أيوه مش ها أقدر أكون أنت لأن أنا موجود.. ماشى جمب الحيط وساعات جواه بس أنا أصلا اللى بانى الحيط ده! وعايش بقواعدى ومبطورش لأن مرحلة تطورى أنا لسه مش جاهز لها طبقا لقواعدي!
أنا فى الجانب الأمن من حياتى لأن حياتى نفسها أكبر مقامرة يا خرجت منها كسبان يا خرجت منها هالك!
بس محتاج منك تساعدنى زى ما أنا عاوز أساعدك متحكمنيش فى قالب أنت اللى مصممه لا هو مقاسى ولا شكلى خلينا أنا وأنت نعمل قوالب كتير مختلفة أدينى من خبرتك وأديلك من خبرتى لأن ممكن فى يوم زى ما مشيت فى ديلك أمشى فى ديل حد تانى وساعتها هتقول عليا خائن ولا مش أصيل ولا غريب!
أنا نتيجة مراقبتك ليا وصمتك عن أنك تحتوينى أنا الأخرّ! أنا ممكن أكون رد فعل وأكون الفعل زيك تمام بس أدينى مساحتي!
أنا الست المحبوسة فى البيت بربى العيال وأنت تتفسح، أنا الراجل اللى قاعدلك بالأولاد عشان تشتغلى وتتطورى، أنا الأم اللى مرضتش تشتغل عشان ولادها يفضلوا تحت عينها، وأنا الأم اللى نزلت واشتغلت عشان تكون أيد على أيد وتساعد أنا الست اللى محتاجة من كلمة حلوة عشان متحكمش عليا أنى نكديه ولا تسيبنى أسمعها من غيرك وأنا الراجل اللى عاوز حد يدينى أحساس بالأمان وأنى أقدر أكمل بدل ما أخبى نفسى فى عباية حد غيرك! أنا الطفل اللى بقولك متضربنيش عشان أتعلم سيبنى أغلط ووجهنى أو عرفنى الأول الصح والغلط متسبنيش لغيرك يبنى لى شخصيتي! وأنا الست اللى شعرها باين بس بخاف ربى فى معاملتى ليكم! وأنا الراجل الروش اللى بخاف على أهل بيتى وبغير عليهم! أنا مش مجهول الهوية أنا هويتى فى اعترافك بوجودها أو مساحتك ليا أنى أوجدها! أنا وأنت فى الطراوة قدام التالت اللى بيتفرج علينا ويراقبنا..
