يا رب أنا من غير أب
ضهرى وسندى ف أى مطب
أحلى سنين وأجمل حب
حنان الدنيا فى أطيب قلب
منايا أشوفه من تانى يا رب
يارب أنا من غير أب
محتاج لأبويا معاه اتكلم
محتاج لحضنه وعليه اسلم
وأبوس إيده أحسن بتألم
وجرح فراقه لسه معلم
يا رب أنا من غير أب
ينصحنى ويوجه فيه
ولو وقعت ياخد بإيديه
وجوده كان مالى الدنيا عليه
وبعده الدنيا بقت تلعب بيه
أيامه راحت خلاص ولا جيه
صوره وذكرياته وكمان حكاياته
من يوم مماته اللى فضلوا ليه
يا رب انا من غير اب
وحشنى ضحكه وحشنى صوته
وحشنى حتى هدوئه وسكوته
قلبى اتقهر من يوم موته
وعايش بقلب خفيف بسكوته
يا رب انا من غير اب
وحشنى كلامه وحشنى أيامه
وحشنى قعادنا معاه وقدامه
وحشنى وهو حتى خارج ف سلامه
وحشنى خوفه علينا وملامه
يا رب انا من غير اب
عايش والحزن ساكن جوايا
كان هو فرحة الدنيا وهوايا
لسه فى كل لحظة عايش معايا
لو حكى الزمان يحكى احلى حكاية
واجمل روايه من البدايه للنهايه
قدرى ونصيبى و الصبر دوايا
لو احكى عليه ولا مليون حكايه
يا رب انا من غير اب
بحق رحمتك يا رب ارحمه
ومن عطفك وكرمك أكرمه
ومن الذنوب اغفر له وسلمه
نور قبره وكتابه يمنه
هو وكل الآباء أجمعين
تم أضافة تعليقك سوف يظهر بعد المراجعة