لمّا شُفتِك..
صورة ليكي جوّة قلبي ..اتكونتْ
باشتياقي.. و بالأمل
إني أشوفِك مرة تانية اتلونتْ
لكنْ فِضِلْت أحس دايما إنها
تشبه صحيح ليكي ف كتير من شكلها
لكنْ ناقصها حاجات كتيييييييييير
عشان تكون " إنتي"......بروحها ووصفها
وحاولت يوم من بعد يوم إني أكمّل نقصها
-لمسة ذكاء فوق الجبين؟!!!
-لمسة حنان في الحاجبين؟!!!
..................لأ لسه ناقص حاجة تانية
-لمسة براءة في الرموش ؟!!!
-لمسة غرام ما حلمتهوش ؟!!!
..................لأ لسه ناقص حاجة تانية
-في الأنف لمسة كبرياء؟!!!
- في العين كمان لمسة صفاء ؟!!!
..................لأ لسه ناقص حاجة تانية
-لمسة أمل ....فوق الشفايف تندهك
بتقول هنا ....فيه ابتسامة بتتولد
راح تسحركْ
تقلب حياتك تشغلَكْ
كِمْلتْ خلاص صورتك كده
ناقصها بس النظرة ديَّا تكون هنا
ليَّا أنا
ناقص كمان لمسة هنا
ولمسة هنا ...... ولمسة هنا ....... ولمسة هنا .........و...
ولمَّا شُفتِك مرة تانية
لقيتك انتي واحدة تانية
كل اللي انا حطيته في الصورة هنا
كان من خيالاتي أنا
ولقيتني واقع في غرام الصورة ديّا نفسها
وإنتي ..؟؟؟؟!!!
يمكن حاجات فيكي كتير تشبه لها
لكن كده ...ناقصك حاجات تانية كتييييييير
علشان تكوني زيَّها
"هيَّه " بروحها ووصفها
تم أضافة تعليقك سوف يظهر بعد المراجعة