لما صدرى بيضيق
ونفسى يهرب منى
اعرف أن عزيز بيعانى
بحثت دورت كلهم بخير
صدرى يضيق اكتر واكتر وحاسس إن الدنيا خرم إبره
صلاة بصلى
استغفار وذكر الحمد لله مداوم
يا رب طمنى ليه الضيق اللى فى صدرى
مش عارف
مين بيعانى
أكيد حد قريب عنده مشكلة
اتصل أدور
كله يقولى بخير والحمد لله
أكلمها تقولى كويسه بيكم
ما انتو سندى وقوتى
انا بخير
أرد وأقول أجى اشوفك واطمن عليكى
لا ولادك وبيتك وشغلك
كلها كام يوم وهتيجى
هو حد قلك إنى عيانه
فى ناس كتير بتيجى وتزور هو الموضوع زاد وناس كتير رايحه جايه بس انا كويسه
انا بخير بس شويه تعب وهيعدوا وابقى بخير
الإجهاد طول والعلاج مش نافع
أراجع التقارير والعلاج اعرف أن طعم المر فى خشمى ايه زاد والالم فى صدر كما حمل الجبال مش قادر أتنفس
الحزن بيخنقنى بس لازم أضحك مع امى
بس صوتى مخنوق
تقولى مالك صوتك مش مريحنى
انت تعبان فيك شىء
صوتى يقطع وأتوقف عن الكلام
تقولى لازم فيك شىء
أصلى هى فعلا من صوتى بتعرفنى
بس المرة دى يا أمى كان الوجع بسببك
موجوع لتعبك
اقولها لا مافينى شىء بس البرد ما إنتى عارفه انك بتعب من البرد وبيأثر على صوتى
روح للدكتور ولا خذ علاج
اقولها ولا علاج ولا حاجه انا بأخذ برشامه والأمور بتبقى تمام
طيب يا ولدى ربنا معاك
لازم تحس أنها بخير
احاول أضحكوا
اقولها ها اخبار الدنيا عندك ايه
مين تعبان
مين عنده فرح
أحب اعرف حال الناس عندك منك
تقولى الناس كلها بخير وبتسلم عليك
تقولى هو انا ليه طول معايا العلاج
طول ايه يا امى هما أسبوعين ثلاثه
العلاج محتاج شهرين
كتير يا ولدى انت عارف انا مَش بحب الدكاتره والعلاج
اقولها امورك بخير هما بس شويه إرهاق
تضحك وتقولى الحمد لله
بس تيجى لازم تفرح وتذبح حلاوه رجوعى بالسلامة ونجاح العلاج
اقولها حاضر إنتى تأمرى وكمان هنروح الحجاز نزور ونعمل عمره تقولى تعيش ويبارك فيك ربنا يجيبك بالسلامه
أتأكدت ليه قلبى بيوجعنى
عرفت ليه الدنيا كانت بتخنقنى
على الرغم أنى معايا كل حاجه ومافيش حاجه تزعلنى
اتارى إللى انا فلذة كبدها اللى هى كل حاجه
هى اللى بتعاني
هى اللى عيانة وتعبها كان بيخنقنى
سلامتك يامى
لازم أكابر وأتظاهر لأخواتى بأن الامور بخير بس شويه العلاج محتاج شهرين ثلاثه
اتنهد فى نفسى وأحبس دمعه
اخاف عينى تخونى وتهز التظاهر بالقوة
وانا اضعف واحد فيهم بس انا أتأكدت وعارف إنها قربت تفارق
عارف بكابوس وبالتقارير
والحمل اللى على صدرى بيقول يوم عن يوم حملك زاد وحزنك محتاج صبر وصلاة لجل يخفف عنك رب العباد
ياريت يا امى التعب كان تعبى اهو كان إنتى مرتاحه وانا كده كده تعبان
ما إنتى ما تعرفيش قد ايه كنت بعانى
جبل على صدرى بيخنقنى
صوت بينادى دور على شخص عزيز بيعانى
حزن بيقتلنى
اتارى الحزن فيكى يا أمى
والتعب تعبك يا أمى
يا ريت الوجع كان وجعى
والالم كان ألمى
والعمر بيتهدى كنت
من عمرى اديكى
ومن فرحتى استغنى ليكى
ومن قوتى اديكى
بس لقدر ربنا
بنستسلم
وعلى كل شىء بنحمده
ما إنتى علمتينى
على كل حاجه كنتى بتقولى الحمد لله
نحن أحسن من غيرنا
كنتى دايما بتقولى الحمد لله
ويارب لما تخيبنى ..غيبنى
واهو ربنا استجبلك يا امى
والموت عنا غيبك
ياريتك يا امى طولتى شويه
اهو كان قعدت معاكى شهر ولا اثنين
هما يومين يا امى وما حبتيش تتعبينى
قلتيها وزعلت منك وقلتلك حتى فى تعبك حساسه
هو يوم يا امى وتقولى تعبتكم
عارفك ما تحبيش تكونى ثقيلة على حد
مع انك استحملتى اللى ما يستحملهوش حد
الله يرحمك يا امى
تم أضافة تعليقك سوف يظهر بعد المراجعة