أنا مسلم عربى ومتربى.... ولا عمرى بهرتل بكلام
هتقولى أيه غير حالك.... ما بقتش بطيق أى حرام
مش هلبس ع الموضة يا صاحبى.... مش هلبس أسورة يا مدام
مش هلبس جينز متقطع... وبلوزة بدون أى كمام
مش هعمل شعرى على الموضة... ولا عمرى هقلد فاندام
دا كلامى واسمعنى يا صاحبى.....أنا عربى ودينى الإسلام
لو شوفت بطاقتى تلاقينى... .من قبلى واسمى همام
راجل والنخوة دى فى دمى....وعادتنا تحسها أحكام
مش هسهر ع النت واشيت...واشهرب وستات وكلام
ولا هبقى من الفانز لنجم... ولا هعمل إعجاب لمدام
وهنظم وقتى بالساعة....وهصلى العشاء وهنام
وهصلى الفجر فى جماعة.... وهطبق نهج الاسلام
ما انا كنت سهير ومدقدق.... وحياتى أغانى وأفلام
وبلف سجاير واشربها ... ومن الدوخة أقول يا سلام
وفاكرها عملالى دماغ.... والكحة تعملى زكام
وان حد سألنى ع الصحة...اضحكله واقوله تمام
ولاعمرى ذاكرت فى كتاب....ما انا اصلى استاذ برشام
وسرقت فلوس الهيروين....وحياتى كلها حرام
وشربت الوسكى بمزاج....واتعشى كافيار وحمام
وما فوقتش غير لما الدنيا....اسودت وبقيت شمام
وتعبت وروحت المستشفى.... وقالولى كلها ايام
عن موتك وهتدخل قبرك.....وحسابك عند الرحمن
واصحابى اتخلوا عنى....وبقيت مكسور متهان
والاهل يبكوا على عذابى....وانا نايم جسمى همدان
وندمت على عز شبابى....ورسمت حياتى لقدام
وطلبت التوبة من ربى....ما انا اصلى ذنوبى اكوام
انا لازم اغير من نفسى....وحياتى هعشها فى صيام
وادعى الرحمن يغفرذنبى....ما انا عربى ودينى الاسلام
مش هلبس توب عند الركبة ....مش هعمل فيها شيخ وامام
مش لازم يوم اطول ذقنى....مش عايز اعيش الاوهام
مش هعمل فيها الشيخ صالح.....انا برضوا اسمى همام
ولاعمرى هدعى لتطرف...ولا عمرى هكون هجام
انا عايز اعيش حامد ربى....انا عايز اعيش انسان
..............................................
تم أضافة تعليقك سوف يظهر بعد المراجعة