خالد صلاح

برعاية سوبر كورة

سوبر كورة

كريم عبد السلام

يا أفيخاى.. ابعد عن «صلاح» أحسن لك

الخميس، 13 يونيو 2019 03:00 م

مشاركة

اضف تعليقاً واقرأ تعليقات القراء
شوف يا أخ أفيخاى، إنت عامل فيها صايع وحلنجى وكل شوية تتحفنا ببوست على فيس بوك بالعربى وإنت مبتسم ولابس بدلتك العسكرية وحاطط البريه فى الكتافة، لأ وإيه وبتصدر كلامك دايما بآيات من القرآن الكريم، وبعدين تدخل على موضوعات سياسية تحاول فيها إنك تنفى كل جرايم الاحتلال الإسرائيلى فى حق الشعب الفلسطينى، وبتحمل الفلسطينيين اللى هما شعب تحت الاحتلال وبيتعرض لأبشع أنواع العزل والعنصرية والاعتداء بالمخالفة للقوانين الدولية، المسؤولية عما ترتكبه دولتك من جرائم فى حقهم، طب ينفع كده بذمتك؟ وحياة «هيلا» الغالية ينفع العوق واللوق اللى إنت بتعمله ده؟!
 
 
إنت يعنى مفكر نفسك أذكى إخواتك مثلا؟ إنت بس اللى درست عربى فى الثانوية وبتحكى وبتكتب بيها؟ طيب هو علشان إنت بتحكى وبتتكلم عربى خلاص يعنى تحاول تستغبانا أو تستفزنا أو تغالطنا؟ لما أنت بتتكلم عربى زى الأراضى العربية المحتلة وزى مفاتيح القدس المعلقة فى أعناق النساء العواجز والمخاتير الفلسطينيين، ليه ما بتتكلمش عن جرائم دولتك اللى القانون الدولى بيسميها «دولة احتلال» فى حق الشعب الفلسطينى الموجود فى طول وعرض الأراضى الفلسطينية المحتلة وفى المخيمات العربية وفى الشتات كمان؟
 
 
وحياة «هيلا» الغالية يا شيخ لتقف قدام المراية وتسأل نفسك، ليه إنت ما بتتكلمش عن مسؤولية دولة الاحتلال الإسرائيلى عن الجرايم فى حق الفلسطينيين؟
 
 
ليه أنت دايما بتحاول تصور لنا إن الفلسطينيين دول هما بس الموجودين فى غزة؟ لأ الفلسطينيين اللى ليهم حق ثابت عندك وعند دولتك موجودين فى الضفة الغربية كلها وغزة وعكا والساحل الجنوبى لغاية شمال أشدود ورفح الفلسطينية على الحدود مع مصر، وده مش كلامى أنا، ده قرار الأمم المتحدة رقم 181 لسنة 1947 والذى يقضى بتقسيم الدولة الفلسطينية إلى دولتين فلسطينية وإسرائيلية مع إنهاء الانتداب البريطانى.
 
 
ليه يا أخ أفيخاى عمرك ما جبت سيرة الخمسة ملايين فلسطينى المشتتين والمشردين فى المخيمات المؤقتة وفى أركان الأرض الأربعة؟ إمتى يا شيخ هيرجعوا بلدهم وياخدوا حقوقهم بذمتك وحياة هيلا الغالية؟
 
 
ليه يا أخ أفيخاى عمرك ما جبت سيرة المستوطنات غير الشرعية اللى بتبنيها دولتك عمال على بطال على أراضى الفلسطينيين، وشوية شوية بتنزع ملكية الأراضى الفلسطينية رغم إن دولتك تقدر تبنى مستوطنات زى ما هى عايزة بس على الأراضى الإسرائيلية وفق قرار التقسيم الصادر عن الأمم المتحدة عام 1947.
 
 
وليه يا أفيخاى ما بتجبش سيرة قرار مجلس الأمن رقم 242 الذى يقضى بانسحاب جيش الاحتلال من الأراضى  الجديدة التى احتلها فى حرب 5 يونيو 1967، والبدء فى مفاوضات لإقامة سلام عادل ودولة فلسطينية على أراضيها، ولا أنت ما تعرفش حاجة عن السلام العادل أو الدولة الفلسطينية، ولما تيجى سيرتهم بتعمل من تركيا وترجع ترطن زى أجدادك الأتراك؟
 
 
كل ده كوم وإنك تستخدم صور محمد صلاح فى بوستاتك، علشان تستفز العرب والفلسطينيين اللى هما بالمناسبة أصحاب الأراض الواردة فى قرار التقسيم الصادر عن الأمم المتحدة عام 1947 وليسوا فقط أهالى غزة، فاهمنى طبعا يا أفيخاى يا حبيبى ها؟ وحياة الغالية «هيلا» ما تجيب سيرة مو صلاح ولا تستخدم صوره تانى علشان ما ننعكننش عليك وعلى اللى وراك، وبالتالى الغالية «هيلا» هتضايق منك وهتقلب عليك، أنت متعرفش المصريين ممكن يعملوا معاك الجلاشة، أو بمعنى تانى ومن غير ما تستخدم كلمة الجلاشة فى بوستاتك أو تغريداتك، أنت عارف كويس المصريين ممكن يعملوا معاك إيه، بس أرجع وأقول أنا شارى خاطر الغالية «هيلا» وبحذرك المرة دى من استفزاز المصريين. 
 
 
آه، حاجة أخيرة يا أفيخاى، ما تستشهدش بالقرآن الكريم تانى، إلا إذا أعلنت إسلامك مثلا، ولا بآيات العهد الجديد إلا إذا نويت تعتنق المسيحية، وأنصحك تستشهد بآيات أسفار العهد القديم واقرأ مثلا سفر «مراثى أرميا»، وتمعن فى جمال النص اللى بيقول:  «كيف جلست وحدها المدينة الكثيرة الشعب، كيف صارت كأرملة العظيمة فى الأمم، السيدة فى البلدان صارت تحت الجزية، تبكى فى الليل بكاء ودموعها على خديها، ليس لها معزٍ من كل محبيها، كل أصحابها غدروا بها، صاروا لها أعداء، قد سُبيت يهوذا من المذلة ومن كثرة العبودية، هى تسكن بين الأمم، لا تجد راحة».
 
ماشى يا عم أفيخاى،  فاهمنى ولا هتستلوح وتعمل من إسطنبول؟!
 

مشاركة

اضف تعليقاً واقرأ تعليقات القراء

الموضوعات المتعلقة

مذكرات الفتوة يوسف أبوحجاج

الثلاثاء، 11 يونيو 2019 03:30 م

الشهداء يقهرون الإرهاب

الخميس، 06 يونيو 2019 03:00 م

لا توجد تعليقات على الخبر
اضف تعليق

تم أضافة تعليقك سوف يظهر بعد المراجعة





لا تفوتك
الرجوع الى أعلى الصفحة