على قد ما اختلاف شخصياتنا جميل ويدعو للدهشة أن كل شخص ليه عالمه الخاص المختلف عن التانى، بس الموضوع ده مخيف فى نقط كتير، زى مثلاً إن فيه شخص ممكن يتكلم معاك يوم واحد بكل صدق ويعتبرك شخص مقرب ليه ويحبك بعشم، وفِى المقابل أنت تعتبره شخص عابر قابلته مرة أو مرتين والسلام، ومافيش جواك ليه أى مشاعر، هو من وجهة نظره عاش خيبة أمل تجاهك وأنت مستغرب من العشم الزايد اللى فيه !
ومافيش حد فيكم غلطان، هو شخص طبيعته كده بيحب ويتعلق بالناس بسرعة ويمكن أنت شخص خسر وفقد الثقة كتير وعشان كده ما بتآمنش لحد بسهولة !
وممكن شخص يكون بيحكى كل مشكلة كبيرة وصغيرة عنده لكل الناس وغيره بيحكى لواحد بس من الناس وغيره بيعتزل الكلام تماماً، وكلهم يكونوا بيعانوا نفس الضغط والحُزن بل ممكن كمان يكون أصمتهم هو أحزنهم .. وماحدش دارى!.
وفيه ناس بتاخد المواقف على كرامتها جداً وماتقبلش لحد يهين كرامتها مهما كان قريب، وغيرها متعود إنه يعدى كل الأمور من غير حساب للكرامة ويعامل الناس على هذا الأساس من غير مايفكر مبادئهم إيه !
فيه اللى كل حياته نفاق ومجاملات عشان مايزعّلش الناس وفيه اللى مابيطيقش يتواجد حتى فى مكان فيه نفاق
فيه من كل شخصية الصفة والنقيض تماماً ومليون درجة بينهم
وعلى هذا المنوال حاجات كتير بتؤدى للفهم الخاطيء واكتئاب متبادل من الأطراف عشان الأغلب بيبص لشخصيته بس ! ماحدش بيفكر إن ممكن فلان يكون عنده شخصية مختلفة تماااماً وفِكر غير
ويمكن ده سبب كبير فى وجود تقليل واستهانة بمشاكل غيرنا لمجرد إننا ماعِشنهاش
حتى لو عِشت نفس المشكلة ف انت ظروفك غير ! وحتى لو الظروف متقاربة انت نفسك غير وقوة تحملك غير
ومن هنا أنا بكره جداً الناس اللى بتبص لكل موضوع من ناحية واحدة، فكروا فى غيركم وياريت تدرس شخصية كل واحد دخل حياتك ويكون عندك مسئولية إنك تتحمل اختلافك معاه عشان تلاقى اللى يقدر يفهم اختلافك بردو، وإلا سطّحوا علاقاتكم وماترهقوش بعض.
تم أضافة تعليقك سوف يظهر بعد المراجعة