ظروف وعدت
كانت صعبة وجُبِرَتْ
ناس سدت
وبأيدها ساعدت
ولجسر الود مدت
ناس ف عينيه كبرت
اعلى من مقامها وعليت
وقت الصعب وقفت
من غير ما انادي لبت
بس اشاور الاقيها همت
من غير ما اتكلم حست
ناس داوت ما جرحت
وف أي احزان شَفَتِ
ناس بلون الحب زهت
متأصله وفي الاصول ثبتت
ناس في الاساس اتربت
عارفه ربها صامت و صلت
واضحة وصريحة ما خبت
زرع الخير فيها نبت
معدنها دهب ولمعت
مهما الدنيا عليها شدت
عمرها ما رخت
على وضعها ما حودت
كتلة جدعنة ما اتفتت
واعية للصح ما شتت
ناس بالعشرة اشترت
كفت و وفت
قوانين الخير عندها اتثنت
انهار المحبة عندها ما جفت
لما اسمها ومواقفها ذكرت
تلاقي سيرة حلوة هفت
بضحكة في البرد دفت
بالدموع في الفراق بكت
وناس تانيه غيرها صغرت
على اصلها ظهرت
وقت الجد فرت
ناس للمشاعر أذت
لا وقفت ولا ساعدت
جواها الكره ما حبت
مثلت علينا وضحكت
و لفرحتنا فسدت
جابت أخرها وخلصت
ولرصيدها استنفذت
في وجودنا استخبت
ولما مشينا شمتت
ناس الوانها بهتت
في القاع هوت
بالكذب والضلال طغت
ولما ملكت بغت
معدن فالصو وقشرت
جابت اخرها و صدت
كتير خدت ولا مرة ردت
لو نالت فضحت
ف أي حاجة ولا سترت
عن الحق صمتت
ولو مصلحة لحد تعنت
و وقت الحاجة فلسعت
ناس باعت ما قدرت
وعند اول شدة خرت
وف اول امتحان هرت
زي الشرائط فاضية وسَفَتِ
ولا تنضف مهما استحمت
دماغها منها لفت
الالسنة منها فلتت
الناس من اعمالهم ملت
حكاويها كلها اتعرفت
لطيبة قلوبنا استغلت
معرفتهم حفرة و اتردمت
شارع بايظ و اتسفلت
ناس كتير عدت
وسنين ع الواحد مرت
ناس افتكرت وناس نست
ناس نزيهة وناس برشطت
ناس بجاحه وناس استحت
والظروف عدت وبينت
ناس فاكرينها وناس انمحت
عدد الردود 0
بواسطة:
عبداللطيف أحمد فؤاد
جميلة لكن
جميلة بس طويلة شوية