يا ست الكل
وحشتينى
أتمنى يكون الوقت كافى وتسمعينى
شايل حمل فوق كتافى وعاوزك أنتى تصبرينى
طب صحيح شوفتى شكلى
تقريبا بيقولوا شبهك وفيا جدا من ملامحك
بس طبعا انتى اجمل
والجميل عشان جميل بيروح ويرحل
مش بعاكسك بس واحشنى كلامى عنك
طب كدا ينفع يا امى
خدنى ياستى الوقت منك ونستينى انى جايلك
جاى اقولك
عامله اى الحياه بدونك
لسه يومى ناقصه روحك
كل حاجه ناقصها انتي
كل حاجه ناقصها امى
طب بقولك
شايفه ابنك!
كل يوم عمال بيكبر
والارزاق حواليه بتكتر
تقريبا بسبب دعاكى
وسهرك عشانى وبكاكي
بس مهما شافونى بكبر
وقالوا عنى انى راجل لسه انا عيل بدونك
لسه حضنك عنى راحل
ياريت يا امى العمر بيا يرجع
كنت هبقى ليكى ودان بتسمع
كنت اشيل عنك كل اللى يوجع
مكنتش هتأخر عليكى
ولما ارجع هبوس ايديكى
واحترم واسمع كلامك
وهلبس طبعا تقيل عشانك
طب قوليلى فاكره اما كنتى تخافى عليا
و ف عز تعبك تدارى عن عنيا
فاكره اما كنت اتعصب عليكي
ومحسيتش ف ليله باللى فيكي
طب هتصدقينى انى شايفك ايوه شايفك
وانتى حضنانى ف يوم مارجعتلك خايف ومش شايف سواكى إنتى
ياااااه يا امى خدنا الكلام والوقت ونسيت اقولك إنى جاى دلوقت اشكرك واعتذرلك
اه صحيح
انا متشكر جدا ليكى وبشكر افضال معاليكي
قال وابويا عاوز يا امى انى اتجوز واحده زيك ايوه زيك
طب هو فى ياستى يعنى حد شبهك حد زيك
وبصراحة يا امى يعنى انا جاى اعاكسك
جاى اقولك
البنات حواليا حلوة بس طبعا إنتى احلي
البنات حواليا تحلى وانتى زى مانتى احلي
