لو نفترض الحب كلمة منها الكلام كله ابتدا
والمفترض ان الخبر بيتم معنى المبتدا
يبقى السؤال ليه أول السطر انكتب
كلمة حبيبتى :
واللى بعد النقطتين صحارى واسعة من الفضا
وفراغ كبير بين شرطتين
وحروف كتير مترددة
ازاى يكون الحب كلمة الحب نعمة
الحب حالة م التقى ومن الهدى
الحب احساس بالرضا
ساعات بيرسم ضل الخطاوى ع الطريق
وساعات بيخلق مية ألف قشة للغريق
وساعات يكون تمرة حنين لصيام سنين
بتبل ريق
وساعات يكون حضن الشجر وضمته لنقطة ندى
وساعات يكون قبطان سفينة
ودفته سامعة الندا ف عيونى كان الحب ده
لكن الحقيقة مش كدة
اعرابى كله كان غبى وايمانى كان محتاج نبي
مين يعرب الحب ف جمل فاقدة المعاني والامل
الحب دايما اسم مبنى فى محل
كسر القلوب
مضاف اليه كل اللى خباه من عيوب
ومن مواجع او ملل
الحب أعمى عجوز وكاره للقا
وعشان يعيش لازم يموت ع المشنقة
وعشان تقولي ف يوم بحبك كونى بقى متأكدة
ان اللى سمعاه من اجابة
كان رد فعلا مش صدى
تم أضافة تعليقك سوف يظهر بعد المراجعة