ما يخافش من ضى النهار
غير الشيطان
ما يخافش من صوت البارود
غير الجبان
وبرغم لون الدم
غطّى الأرصفة
لسّاكى يا مصر الوطن
حضن الأمان
لسّاكى أكبر
من عيون الطمّاعين
لسّاكى أقوى
من عقول المجرمين
وما فيش إيدين تمنع جرس
يحضن أذان
صوت الولاد وقت الخطر
أكبر دليل
على إنّهم قادرين
يعدّوا المستحيل
لو يوم بكى صوت الأذان
جرس يئن
ويحن للى ف حضنه نور
والنور دليل
مسلم مسيحى ف أرضنا
أخوات بجد
والدم مد ف جسمهم
من نهر نيل
والحب دايما يقسموه
على حضن بعض
وف وقت نومهم
يقسموا الحلم الجميل
أكبر دليل ع الوحدة
إحساس الأمان
وما حد بات وقت الشبع
بينهم جعان
يا مصر سمّى ودوسى
فوق المجرمين
دا ما فيش إيدين تمنع جرس
يحضن أذان
تم أضافة تعليقك سوف يظهر بعد المراجعة