صدر حديثًا عن دار كليوباترا ديوان شعر تحت عنوان "الوفاء طبع الكلاب، للشاعر أحمد محمد حسن.
ومن قصائد الديوان:
احكى و فضفض
بص يا صاحبى أنا جاى اليوم
لأجل إحساسى إنك مهموم
و عارف إن القلب معبى
آلام و جراح و كسور بالكوم
أصل المشكلة مش فى عقولنا
ياما صرخنا شكينا و قولنا
و مهما هاتشكى و كنت عليل
ساكنه همومك طول اليوم
بس بتدبح فيك بالليل
كل الناس عاتبين ع الوحدة
و فيها الشعراء قالولنا قصايد
محدش حاسك حتى حبيبك
لما بتبعد هو يقرب
تيجى تقرب هو يسيبك
شبه قانون لو مره تعارض
الكل يطالبك تبقى محايد
إحكى و فضفض قول أنا سامعك
رغم إن الفضفضه بتدين
و اوعى فى يوم تستحى من دمعك
أصل الراجل عمره ما يبكى
إلا إن ثار جواه براكين
ربك لما بلاك بالهم
كانت حكمته إنك تتهذب
ركز و افهم مرة يا عم
الرحمن مخلقش الناس
علشان تتهان أو تتعذب
خليك دايمًا واثق جدًا
إن الله سامع لدعاك
و أما الفجر عليك راح يدن
أدعى أكون فى الجنة معاك
و انا إن صابنى الدور و سبقتك
هافضل أدعى و هستناك
غلاف الديوان
