فيسبوك
واتساب
بين السطور كلام يتقال حكاوى وموواويل مايفهمهاش إلا إنسان لماح.
بين سطور الفرحة حزن ما يحسش بيه إلا الحبيب القريب، بين سطور الكراهية وجع اتوجع بيه إنسان واتظلم وظلم، بين سطور البراءة فيه إنسان خبيث يقابل البراءة بالقيل والقال.
بين سطور الجد ضعف وشوق وحنين خايفين يظهروا ألا يتقابلوا بقسوة وأنين.
بين سطور المجاملة نفاق وغرض خبيث ولئيم، بين سطور الهدوء غضب كامن وبركان شديد.
بين سطور الصمت عتاب ولوم. بين سطور الجفا صدمة اتصدم بيها من الحبيب القريب. بين سطور الوفاء عهد حلف ما يخون حتى لو اتخان.
بين سطور الرقة حنان فياض زى الأنهار لا يجف ولا يبخل بفيضه على القريب والبعيد.
بين سطور الأصل معدن نفيس لا يصدأ مهما طال الزمان. بين سطور المكر إنسان خبيث ضعيف يتلوى زى التعبان.
بين سطور الحب شوق ورغبة تظهر من العين وممنوع على اللسان الكلام. بين سطور العشق عبد حافظ عليه وأحسن إليه.
بين السطور كلام وكلام يتقرا ويتقال فيه مواويل . أقروا ما بين السطور .. الناس أشكال وألوان . افهم واتعلم وبلاش تتكلم خلى الكلام قليل وعزيز . وبلاش تضيع الحبيب حتى لو كان على القلب تقيل . ابعد عنك اللئيم الخبيث حتى لو كان السكر من لسانه مكرر.
بلاش تقابل المعروف بالجحود وبلاش تتقرب من إنسان بيبعد . اتقرب من النظيف أبو ريحة حلوة وأبعد عن القذر ما ينوبك الا ريحته العفنة.
بلاش تزعل على اللى راح بس حافظ على اللى جاى، وبلاش تخلى الدنيا كل همك وخلى همك للى خلقك، حب ربك وحب الناس بس بلاش تفصح عن حبك إلا لإنسان هيحافظ على عهدك.
