بتحاربوا ليه؟
وتحاربوا مين؟
وتحاربوا فين؟
د احنا التراب اللى احتضن
راس الحسين
وإحنا اللي راح
منّا الكتير عند الحدود
وإحنا اللي قولنا
ألف أهلا بيك يا موت
أرواحنا هانت
لجل أولى القبلتين
بتحاربوا ليه
وأنتوا اللي منّا
وإحنا منكم روح ودم
كل القنابل ..
ف الشوارع غاوية هدم
كل الغيطان ..
مقطوف ورودها بفعل وهم
كل المبانى ..
ف توب حداد الميّتين
بتحاربوا مين
دا إحنا اللي طول العمر
بنّا عيش وملح
وإحنا الوجع نفس الوجع
والجرح جرح
وإحنا الدموع وقت الدموع
والضحكة فرْح
وإحنا انفجار الأهه
من بطن الأنين
بتحاربوا فين
مش دى الحضاره والتاريخ
والأهرامات؟
مش دي المآذن والدفا
والأمنيات؟
مش دي الغيطان الطارحة
كل الطيّبات؟
من عصر يوسف
هيّ بيت المحتاجين
بتحاربوا ليه؟
وتحاربوا مين؟
وتحاربوا فين؟
عمر الربيع ..
ما يكون خراب أرض الخَضَار
عمر الخريف ..
ما يجيب معاه غير البوار
عمر الضلام ..
ما ح يبقى معنى للنهار
ومافيش بوار
بيعيش معاه الطيبين
إخوة وطن
إخوة مكان
إخوة جراح
إخوّة بصحيح
واللا أنتوا جايين م السِفاح
الله أكبر
ثم حي على الفلاح
بس الفلاح ..
ما يجيش بإيد المجرمين
بتحاربوا مين؟
تم أضافة تعليقك سوف يظهر بعد المراجعة