الشوارع
والطرق
والمواصلات ف النهار
والانتظار
تحت شمس مولعة
والقلب نار
رن الموبايل.. أنتى فين
جاية وبأسرع ما يمكن
يلا وحشانى العنين
ويا ريحتك
حتى صوتك كان واحشنى
حبى بين حضنك ناقشنى
أحلى وردة وبين أيديا
والبعاد عنك حايشنى
والشوارع هى هى بتنادينا
والكافيه.. بيحس بينا
مره كولا مرة قهوة
مره شاى بحليب
حتى ريحتك جوه طعم الشاى
للأماكن بتنادينا
يا خطاوى حسى بينا
حسى باللى ماشيين عليكى
حسى بالتفاصيل
لما بنكون مبسوطين
أو بنبكى م البعاد..
حسى بسكوتنا الكتير
حسى نبرتنا الحزينة
حسى كل ما يبقى فينا
الاشتياق
حسى بالقلب اللى ضاق
وأن البعاد مهواش مكان
البعاد ممكن يكون إنسان
حسى نظرات الحنان
حسى حد بيحضنك
وأنتى وحدك ..
رجعى كل اللى فات
حسى بصمة كان سايبها
ف كل حتة .. حتى فيكى
حسى أنفاس بتناديكى
حسى واحد
عمره لحظة ما داق حنان
غير وهو بين أيديكى
هو كل مشاعره ليكى
كان بيتعلمها فيكى
زى طفل بيحضنك
كل ما يبص ف عنيكى
الشوارع ليا فيها ألف ذكرى
وأنتى فاكرة
لسه برفانك ماليها
كل ڤاتارين الشنط
بصمة عنيكى لسه فيها
حتى نفسك لسه حاسس بيه معايا
ياللى نظرة وحده منك
ليا ميت مليون حكاية
وحشتينى ياكل الماضى والحاضر
ياكل سنين كتير جاية
تم أضافة تعليقك سوف يظهر بعد المراجعة