مين قالُكم ؟
إن الفُراق و الوحدة بـ تزيد الجفا
مين قالُكم ؟
إن الهروب م الحب معناه الشِفا
مين قالُكم ؟
لو لحظه عنا ترحلوا هـ نحس يومها بـ الدفا
أنا عايزة بس تقدّروا
حجم الحنين جوايا لحظة بُعدكم
بـ يعلم الكون الوفا
الضحكة فيا بـ تتصنع
ما بحسهاش
فيه ناس ندوق الهم لو
ما قابلنهاش
و الأكل مالهوش طعم
إلا فـ قربهم
و احتاج أحس بـ ودهم
و ما ينسوناش
عيشوا معانا حِلمنا
طول الحياه
واوعاكوا يوم تتحججوا
بـ ظروف غريبة ما عشناهاش
خلونى دايماً جمبكم
و ما ترحلوش
خلونى نُقطة فـ ضِلكم
و ما تسألوش
عن حتى مقدار حُبكم
و بـ إيه نعالج هَجركم
لو غاب علينا فَجركم
و ما شوفتكوش
باشتاق لُكم و انتم مكانكم
أغلى حته فـ الضلوع
و ان كنت بكدب اسالوا عنى
المشاعر و الدموع
هـ تحسوا فيها صدقها
و هـ تطلبوا منى
المحبة و الرجوع
فـ ما تحكموش
عنى بـ سهوله و تهربوا
و بـ سرعة أكتر
تفردوا ليا القلوع
بقعد لوحدى ساكته دايماً
كل ليله دون كلام
حتى ما بين أصحابى
بـ اشعر بـ الملامة و الآلام
مش أى حد بـ نعرفه
بـ ندوق معاه معنى الهوىَ
و نحس وياه انسجام
قلبى فصيلة دمُه هى نظرتُه
و معاه بـ يحلو الغرام
و بوشوشُه وقت العتاب
و بحب اشوف نفسى فـ عنيه
قلبى ما بين حُضنه كتاب
أوراقه دايبه بين إيديه
أنا روح و طايره فـ السما
دايقه العذاب
لكن كتير مشدوده ليه
إوعاك فـ لحظه تختفى
أنا خايفة جداً م الرحيل
ازاى يجينى الضى
من حُضن القمر
و انتَ القمر و انتَ الدليل
و ازاى يطيب التَمر ليا
و يستوى دون النخيل
إرجع و رجّع كل حاجه فـ دنيتي
و اوعى مشاعرك تبعدَك
و اوعاك تكون فيا بخيل
تم أضافة تعليقك سوف يظهر بعد المراجعة