طلقتك بالتلاتة وبطلت أسمع لك
كان إيه تانى خلانى أرجع لك
شُغلانة خسرانة من غير تمن
تؤمرى تتأمرى وانصاع لك
طول عُمرك وأنت الشقية مجنونة
من لما كنتٍ شراب وخيط وبلونة
فى الغيط والجُرن والحارة والشونة
بيكى اكتفينا لو كانوا يموتونا
لفيت وراكى ياما عـٍزب وكـفـور
المغرم أنـــا العاشــق الـمـبـهور
في عـٍز البرد أو حرارة الصيف
أسألى عنى المنشية وبرج النور
فــــأول .. أوت و الكعبلة بهدلــة
الصبر رغم الطفولة سباق مرجلة
الجوع والعطش ما كنا بنعرفه
أجسام مالعرق هفتانه متفتلة
على كتفى عصاية جدى معلمة
فى دراعى لسه الإصابة سمه
رافض ما أسيبك رغم الجروح
حشايا ع الأرض والدم ملحمة
صُغَيـًرة ومستديرة صحيح إنما
الناس لعشقك مستكينة مسلمة
زعماء ملوك فقرا أغنيا
قادرة وساحرة م القلوب متمكنة
طلقينى انت بالتلاتة وصدقينى
وعد منى أبدا ما هــ تشوفينى
غالب يتغلب ما أشجع منتخب
ادينى الكارت الأحمر ريحينى
تم أضافة تعليقك سوف يظهر بعد المراجعة