محمد زكريا حبيشي يكتب : تالته أول

تالته أول إبتدائي

كنت فـ الفصل الصُغير

وقت زاد فيه اشتياقي

وقت قلبي فيه تغير

شفت حور م الجنه نازل

شفت أجمل شي يحير

حُب كان بـ الفطره فيا

دون غريزه

كانت الشهوه بريئه

كانت الأحلام عزيزه

كل شئ كان فيها ساحر

كل أفعالها لذيذه

رغم إن الطفل فيا

كان شروطه فـ الحبيبة

مش جمال أو حتي عود

أو وعود هـ يقولها ليها

 و يجاريها يوم و يخلف

و يفارقها أو يعود

لأ دا كان مُعجب بحاجه

هو نفسه مش عارفها

حاجه بـ تبرجل كيانه

كل ما ده لو يشوفها

حاجه بـ تزود عذابه

لو هـ يتمرد فـ مره و يخالفها

قلبي كان فـ الكون برئ

كان مالوش أبداً تجارب

هو كان فـ الشوق غريق

بس كان أفضل محارب

ليه عقيده فـ الحنين

بس مش كان ليه مآرب

قلبي كان فـ الحب مُضغه

ف الغرام لسه بـ يحبي و يستهجي

بس نورها خلى شوق جوايا يطغى

و المشاعر فيا صادقة

 بس محبوسة فـ حلقى

 شئ و مجبور يستخبى

كان فـ قلبي الحب نور

كان تملي بـ يستمده من عنيها

كان يصدُه ألف سور

بس لازم عن عيون الناس

 يوماتي بـ يداريها

من طرف واحد حقيقي

كان حنيني كل لحظة بـ يناديها

و الخجل كان شئ مانعني

أعترف بـ الحب فيا

أو أعبر مره ليها

 بس كان يكفيني ضحكة

لما أسلم يوم عليها