لسة فاضل يوم....هتيجي؟!
قبل ما تسافر واشوفك
والا هتسيب قلبى يشحت
طلتك بين القهاوي
ويلم دوسك م الطريق
ويشم حبات التراب بعد الخطاوي
انت عارف انى عايشة فيها
يمكن كالغريبة
بنت تاهت من كتاب الالف ليلة
لحضن وهم
لا يوم قابلتك صدفة فوق كوبرى الاحبة
ولا حفرت من الشجر
ف المنتزه قلبين وسهم
معرفش أن كانت حقيقى اسكندرية
اللى ياما حكولى عنها
والا انا اللى عايشة فيها محض حلم
ما علينا ...عايزة اشوفك
عايزة أطمن بخوفك
وابكى موج على شط فرحك
ولو لاقيت الحزن سبنى ليك وشارد ..
ارمى فوق الجرح ملحك
طهره بالدمع اكتر
عارفة أن هوانا مُر
بس حبك مُره سكر
وانت غرقان برضه زيى ف الهموم
بس قادر رغم حزنك ..بيا تسكر
سبنى اكون الكاس ف ايدك
وابقى بيك المؤمنة والكل كافر
سبنى اكون ونسك ف عيدك
نجمة بتسامر طريقك لو تسافر
خد دموعى رشتين برفان وقوم
خد عيونى العطشانين ف البعد نوم
وخلى قلبى ف انتظارك
قبل ما تسافر
بيوم
تم أضافة تعليقك سوف يظهر بعد المراجعة