فيسبوك
واتساب
الدم الطاهر حررنا
ورواكى يا سينا وطهرنا
ومحينا الليل جبنا نهارنا
والشمس تلاغى ف قمرنا
وف عز نهار قمنا عبرنا
وكسرنا الخوف أيوة كسرنا
ورايتنا ترفرف فى العالي
وغنايا لبلدى بيحلالي
ولا شبر هسيبه من أرضك
ولشرفك صاين آه وعرضك
وف عز سهادك آه ومرضك
بدراعى هضمك واحميكي
وهطبطب قلبك واراضيكي
وان مس عدوى أراضيكي
بسنانى هقطع مصارينه
جنونتى تجنن مجانينه
البطل المصرى وعارفينه
على مر تاريخه وسنينه
ف الشدة تملى الرجالة
ف السلم بننصب سقالة
وإيدين عرقانة وشغالة
ف الحق ما تسكتنا قوالة
للظلم ما نحنى لضهورنا
والنيل يسقينا وطهورنا
ونلملم ف الضعف كسورنا
ف الراحة نولع لباجورنا
وبنشرب كوباية الشاي
والحقد ف قلبنا نساي
وان سرق السارق للجاي
لو حتى غنى ع الناي
بنفوقله ف لحظة ونديله
والشعب هيفرش منديله
والديب هنجيبه من ديله
لو لف علينا اللفات
والتعلب لو مر وفات
هنجيبه ونعيش ف تبات
