قال حسن شحاتة، المدير الفنى الأسبق للمنتخب الوطنى، إن هناك الكثير من الأشخاص يريدون أذيته، موضحا: "عمرى ما اتأذيت فى حياتى إلا من الناس اللى خدمتها، اللى لحم اكتافهم من خيرى.. لكن هى دى سنة الحياة".
وأضاف شحاتة، خلال حواره مع الإعلامية سمر يسرى، ببرنامج "أنا وأنا" المذاع عبر قناة ON E: "زعلت بينى وبين نفسى لما فاروق جعفر مجبش سيرتى لما اتكلم عن أفضل لاعيبة"، مستكملا: "حتى حصولى على رجل العام فى أفريقيا فى 2014 واتكرمت فى البرازيل على شرف كأس العام محدش جاب سيرة الموضوع خالص، وأنا لما بتكلم على الحاجات دى بزعل نفسى مش بفرح نفسى جدا، وشايف إن فيه ناس كتير حولى بتحقد عليا بشكل رهيب".
وأشار إلى أن الكابتن الراحل صالح سليم قام بزيارة للكويت أثناء لعبه لأحد الأندية هناك، بعد اتصال بينه وبين طبيب النادى الأهلى لرؤيته، وتابع: "الطبيب كلمنى علشان نقعد مع الكابتن صالح، وعند مقابلته عرض عليه الكابتن صالح الانضمام للأهلى، وقلتله أنا مش من القاهرة ومش بشتغل ومعنديش سكن ومعنديش مانع أنضم للأهلى، وكان الزمالك عارف وقتها"، مردفا: "قررت أن أرجع مصر رغم إن أحلى 6 سنين فى حياتى كانوا فى الكويت، رياضيا ومعيشيا، واتعرض عليا الجنسية الكويتية لكن خدت قرارى بالسفر، ورجعت على الزمالك.. والأهلى بيقدر يخدم على لاعبيه بشكل كبير جدا".
