صور .. طفل دخل المستشفى لإجراء جراحة فتاق فأجريت له 4 جراحات بـ40 يوما

إنها حقا مأساة أن ترزق بطفل بعد انتظار 17 عاما ويقضى عليه الإهمال الطبى أو خطأ طبيب، أحمد محمد أحمد محمود طفل عمره 4 أشهر ذهب به والداه لإجراء عملية فتاق فأجرى 4 عمليات فى 40 يوما، وما زال يحتاج لعملية خامسة .

وأكمل والد الطفل: وبالفعل قرروا إجراء العملية بالمستشفى ولكنهم لم يجدوا طبيب تخدير اتصلت مرة أخرى بعضو مجلس الشعب الذى تواصل معهم مرة أخرى وبالفعل وفروا طبيب تخدير وعندما وصل الطبيب الذى من المفترض أن يجرى العملية لطفلى نهر الموجودين وسألهم كيف تتركون طفلا فى هذه الحالة كل هذا الوقت ودخل الطفل غرفة العمليات بعد أن وقعت إقرارا بموافقتى على إجراء العملية فى حدود الساعة الواحدة صباحا.

وتابع والد الطفل الضحية:وخرج طفلى من العملية ونقلوه إلى الحضانة ويوما بعد يوم وأنا ألاحظ أن حالة ابنى تسوء مع العلم أن الأطفال الذين أجروا نفس العملية كانوا يخرجون بعدها بيومين أو ثلاثة ، وعندما أسأل الطبيب الذى أجرى العملية يقول ما أقدرش أفيد بحاجة سلم أمرك لله حالة الولد صعبة.

أما والدة الطفل فتقول يوميا أذهب إلى المستشفى منذ دخول طفلى إلى الحضانة وغير مسموح لى بالدخول فقط أراقب ابنى عبر زجاج الغرفة فقط أحضر احتياجاته من بامبرز وغيره وأسلمهم إلى الممرضات.

وتكمل والدة الطفل: ابنى قعد فى الرعاية المركزة بالحضانة 41 يوما أجرى خلالها 4 عمليات لم تخطرنا المستفى سوى بالعملية الأولى والأخيرة فقط، يعنى عمل عمليتين فى لم نعرف عنهما شيئا، وفى يوم العملية الأخيرة اتلصت بى المستشفى وقالولى تعالى المستشفى الولد محتاج دم وهاتى بطاقتك معاكى علشان الولد محتاج عملية، اتصلت بوالده وأخبرته أن يترك العمل ويأتى للمستشفى بسرعة، وبالفعل ترك والده العمل وأتى إلى المستشفى ودخل ابنى غرفة العمليات وخرج بعد ساعة ودخل العناية المركزة فى الحضانة تانى ، وفى يوم 6 / 2 كلمونى وقالولى تعالى علشان ابنك هيخرج من الحضانة وهيروح قسم الجراحة وبالفعل تم نقل الطفل، وبعد كام يوم كان فى طبيب بيمر على الحالات وسأل على الطبيب اللى أجرى العملية لابنى وقال هو لازم يجى يتابع الحالة دى، وبالفعل أتى الطبيب وكتب للطفل على خروج وقالى هاتيه بعد أسبوعين علشان احنا مش هنقدر نعمله حاجة تانى هنا، الولد جسمه ضعيف ومش هيتحمل عملية تانية هاتيه بعد أسبوعين.

وتتابع الأم: الممرضات فى المستشفى كانوا بيقولولى خرجيه من المستشفى وديه مكان تانى العملية باظت بس ما تقوليش لحد إن احنا قولنالك كده، وبالفعل خرجت من المستشفى ورحت مستشفيات تانية وكلهم قالولى ارجعى للدكتور اللى عمله العملية هو يتابع معاه، ورجعت بعد أسبوعين للدكتور قالى تعالى بعد أسبوعين تانى قلتله يا دكتور الولد الجرح ملتهب والولد تعبان قالى لازم الولد وزنه يزيد شوية علشان نقدر نعمله عملية تانى، وبعد أسبوعين كلمت الدكتور وقلتله أنا المفروض هاجى لحضرتك بكرة قالى تعاليلى على المجمع "المجمع ده جنب المستشفى" وبالفعل ذهبت إلى الدكتور وقالى نفس الكلام هاتى الولد لما جسمه يملى شوية وقلتله يا دكتور الولد كل ما ياخد الرضعه بيعمل حمام وبيرجع كمان هيملى منين بس.

وتضيف الأم: المستشفى رفضت تعملنا تقرير طبى وأنا رحت مستشفى خاص علشان أشوف أى حل بس قالولى ممكن نعمله العملية بعد سنة، أنا مش عارفة ابنى هيفضل كده بطنه مفتوحة لمدة سنة، احنا مش عاوزين نشتكى حد ولا حاجة احنا بس عاوزين ابنى يخف ويرجع طبيعى تانى.