صور.. مرفت أرملة تعول 4 أطفال كل دخلها 250 جنيها وتطالب بمعاش

الخميس، 05 أبريل 2018 05:17 م

مرفت وأبناؤها الصغار

كتب رامى محيى الدين

اضف تعليقاً واقرأ تعليقات القراء

مرفت أنور السيد شابة تبلغ من العمر 34 عاما توفى عنها زوجها منذ 9 أشهر وترك لها 4 أولاد 3 ذكور وطفلة أكبرهم يبلغ من العمر 15 عاما جميعهم متسرب من التعليم عدا الابن الأصغر فى الصف الأول الابتدائى.

1f579773-19df-474e-943e-30e53ee9f88c
محرر اليوم السابع مع ميرفت وأولادها

تحكى مرفت مأساتها لـ"اليوم السابع" فتقول: أنا مش متعلمة أهلى خرجونى من المدرسة وأنا فى 3 ابتدائى واتجوزت حداد مسلح وبعد ما خلفنا 4 أولاد اتوفى كلهم لسة صغيرين وأنا ما بقدرش أشتغل لأنى عندى إصابة فى ذراعى الأيسر ومركبة شرائح ومسامير.

56bfe6f8-14a0-4b6b-8e3b-2e8f258ebbd4

إصابة مرفت

وتضيف مرفت: ابنى الكبير "عمره 15 عاما" بيشتغل فى ورشة نجارة وبيقبض 50 جنيها كل أسبوع يعنى 200 جنيه فى الشهر، ما حدش كان راضى يشغله علشان هو لسة صغير بس هنعمل ايه ما حدش بيسأل علينا غير واحدة من الجيران مرة تجيبلنا أكل ومرة تساعدنا بـ50 جنيها بس مش علطول ومش ليها مواعيد بس هى مش بتنسانى، وكمان فى جمعية هنا بتدينى كل شهر 50 جنيها.

وتتابع مرفت: أنا قدمت على معاش بس لسة ما صرفوليش ومش عارفة هيصرفولى ولا لأ، أهلى ناس على قدهم وأهل جوزى مش بيسألوا حتى عننا ماليش غير ربنا.

وتقول مرفت: أنا مش محتاجة غير معاش يكفينى أنا وأولادى شر السؤال أنا كل دخلى 250 جنيها أنا بدبر بيهم أمورى ومصاريف أولادى حتى الكهرباء جوزى أتوفى وكان بقاله 3 سنين ما دفعش، والشركة كانت هتقطع عنى الكهرباء لولا موظف ابن حلال خدنى الشركة ومعايا شهادة الوفاة وقالهم انى مش معايا أدفع، ودلوقتى كل ما أوفر 20 جنيها أو 30 أروح أدفعهم مش بيقولولى حاجة.. الحمد لله أنا مش عليا ديون لحد.