..جواب رقم ( (1
بعد التحيه واحترامى
بعد شهرين م الغياب
كل يوم شايفك قصادى
بعتذر قبل العتاب
عارفه بعدك إيه جرالى
كل يوم هكتب جواب
وأدى أول سطر بادى
بسم ربى فتحت باب
قبل شهرين كنت عادى
وكنت مستعجل ساعات
كنت شايفك سقف فاضى
بيت ملوش أركان حيطان
وادى شجرة كبريائى
بأن خريفها على العيدان
سقطت أوراق حياتى
وحالى كان مستور وبان
صمتى سلم لاشتياقى
وهمسى بيرج المكان
صوت أنينى فاق سكاتى
ضعف ضعف الكون وزاد
ثورة قامت فى الميدان
جيش مشاعر مشحونين
بعد شهرين م الفراق
صبحوا زى الشحاتين
مش بلوم قلبى اللى فاق
أو بلمح بالحنين
كنت جنبك كوم غباء
عقلى كان مليان بطين
وأدى قصة قلب خاب
والمشاعر عريانين
أرض خالية من التراب
جيش عرمرم مدبوحين
قلبى كان تجميد وداب
لما شوفتك من بعيد
شوفت قطر العمر ساب
حب عايش من سنين
يا حبيبتى الانسحاب
عمره ما بيشفى العليل
قفلت بعدك الف باب
ألا بابك مستحيل
قلبى عامل 100 حساب
وعينى رافضة تشوف بديل
حتى روحى فى ضل كان
ساكنه بحر المشتاقين
وأدى مضمون الجواب
انتى بالنسبة لى ميييييين
نبض قلبى لو كلام
قلمى يكتب م الوريد
حبى ليكى لو فتات
يكفى كل العاشقين
بكرا هكتبلك جواب
لمى أحساسى اللى فيه
هاتى كوم مليان تراب
عدى حباته تلاقيه
.......بحبك........
تم أضافة تعليقك سوف يظهر بعد المراجعة