أنا عايشة نملة
بلم حبات الدفا لبرد الشتا
واخزن الشمس اللى تايهة
ف الخريف متشتتة
واتغطى بالحلم اللى باقى م الربيع
وانام وأنا متكلفتة
أنا زى كل النمل بسعى
من أمتى يعني
فى نملة عايشة ف جحرها متستتة
بستنى من بق الزمن
كام ضحكة حلوة مسكرة
واجرى عليها وألمها
لو حتى واقعة مكسرة
على أرض حزنى مفتفتة
أنا ماشية جنب الحيط وخايفة
لتكون عنيكم ليا شايفة
وتكون حياتى للبشر
واضحة وصريحة وملفتة
حافظة النظام
واقفة الطابور
عايشة الحياة بأدى دور
انا مهما كل الكون يدور
على أرضى واقفة متبتة
وأما الرياح قلعت سنين
وعمرى راح منه الحنين
صليت جنازة المجروحين
وأنا اللى روحى ميتة
