القلب كان المملكة
والعرش نظرة
من العيون المهلكة
فى جناين القصر الحزين
عناقيد بشر متعلقين
وقلوب كتير متشبكة
والجن متسخر لحرفى
قايد شموعه ف هيكلى
وهدايا نازلة من السما
يا آية الحسن اقبلى
وانا عمرى مرهون ف السبق
ملكة ف قصر من القلق
بلقيس... انا من غير سبأ
وهدهده
على سطرى واقف من بعيد
مستنى يحمل له النبأ
غاب الحزين عن مجلسه
من غير ما يشرحله السبب
ولما هدد يحبسه
حكاله عن سحرى العجب
قاله الاميرة بسحرها
الفضة دايبة ف نحرها
والشمس غايبة ف بحرها
ومن شعرها سال الدهب
كل القلوب سجدت لها
وهى ساجدة للأحد
وف الغرام كان شرطها
ف القلب ما تشارك احد
فأجاب لشرطى ومطلبي
وانا قلبى عمره ما كان غبي
صدق اوام أنه الملك
وانه ف الحب النبي
وقبل ما يرد الطرف
كان قلبى سلم واعترف
ففتحلى ابواب جنته
والف غرفة من الغرف
وقالى خاتمى ف اصبعك
لو تندهى راح اسمعك
مية الف جنى هيتبعك
م الليلة انا ليكى السند
ومفيش دموع راح توجعك
آمنت بيه ومصدقة
بس الهوى مش بالرؤى
كل الأمانى بتنتهي
لو لحظة غاب عنى الأمان
أو شكى أكل المنسأة
تم أضافة تعليقك سوف يظهر بعد المراجعة