ريم رضا عبد العزيز تكتب: حضرة المحترم أبى

حضـرة المحتـرم أبــى 

بعـد التحيـة و السـلام 

عايـزة أقـول لحضرتك 

خلصت فيك كل الكلام

 إللــى ممـكــن تسمعُــه

 فتحس راحة وانسجام 

مُغـرمـة جــداً بِطَلِّتَــك 

يا فارس رُوحى الهُمام 

أمَّــا عَنِّــى يـا زعيم

 كفايه إن اسمى ريم

 اخترتهـولى حضرتك 

بكـل عنايـة واهتمـام

 كان حلمى صعب أحققه

 وعانيت كتير لجل ألحقه

 طَمّنـت قلبــى بصُحْبِتـك 

نَــوَّرت روحــى بفكـرتك

عَلِّيت طموحى باحترام 

شَجَّعتنــى أحِــب الخيـــر

 أعيش على صوت الضمير

 ومهمـا أقـابـل فى الحيـاه 

لله أوجِّـــه شَكـــوتــــــى  

ما ألجـأ لغيره فى شدتى

 و فهمـت معنــى الالتزام

 أُقسِــم بـالله العـظيـــم 

إنَّـك يـا والــدى عظيـم 

ضحيت عشانى ببهجتك 

وقتك طموحك، صحتك 

والحقيقة قلبــى شايفك 

قيمـه و قامـه و مقـــام 

الله يـديـــم مـحــبتـــك 

ويبــارك لـــى بصحـتــك 

وأعيش أرسملك ضحكتك 

وانت عامل إيه؟! تمام !!