ادينى عيون بصيره
تايهه وسط زحمة مشاعر
هطول امطار من الافكار
من كل اتجاه و فى كل زاويه من الدماغ
انا مين انا فين انا عاوز ايه
ايه سبب الخوف و سبب صحيان نص الليل
و ليه دمعة على طول حاضره
فى وقت فرحى و حتى حزني
حاضرة و ياريتها طالعة
بمسحها ساعات من خدى وساعات ابص جوة
و قولها خليكى جنبى
بلاش ميصحش تبانى دلوقتي
وليه على طول احساس الغربة قصاد عيني
حتى وسط الصحبة ووقت السهرة
مش مفارق دواليبى
ليه كل قاعدة ببقى ساكتة
ولما اتكلم محكيش عنى
مقولش انا مين
واردم ضعف سنين
تحت ضحكة بايته من ايام اللعب بالطين
مع مين نكون احنا
ازاى نضمن محبتهم بعد ما نكشف ضعافتنا
ولو اخويا و لو صحبى و لو ابويا و لو امى
مفيهمش طعم الامان فين ندوقوا
حد يرد يا متعلمين
حد يقولى امتى تتكسر دواير لفتها السنين
علامات فى القلب اتورثت لجيلين
و لسه لستة حاجات جديدة
اكتب عندك و كبر الورقة
يا توفروا الامان و القبول
و تجسدوا الحب بدل الكلام المعسول
يا هاينتهى كوكب البنى آدمين
و هاننسى شكلنا كان إيه من سنين
تختفى البراءة وتتوه الضحكة الصافية
بين ليالى العطشانين
عطشانين للحب وللشفا
محتاجين الطبطبة
محتاجين حضن حلو
حضن ينسى مر وانين
مد ايدك بالحب
أروى قلوب بارت من الهجر
احضن صحابك
المس ولادك
بوس مراتك
زود الدفا فى كوكب اتجمد من قله المشاعر
ده إحنا مخلوقين للحب وللحنين
