وائل مسلم يكتب: حصن الأمان

أمى يا أحلى كلمة قالها لسانى وأنا صغير..

يا حنينة على حتى وأنا كبير..

يا قمر منور وبدر منير..

يا قلب عطوف بإديكى الحنينين..

 شلتى منا الخوف، وحنانك مالوش مثيل..

يا نبض حنون سهرتى يا امى علشانا أيام وسنين

ولا اشتكيتى من سهد الجفون..

يا أمى يا غالية يا نور العيون..

بحبك وأكن ليكى كل احترام وأبوس الإيدين

 وفضلك علىّ عظيم..

يامحوطانا بنن العيون..

يا خايفة على ولادك من أى مكروه، مين غيرك إنتى يخاف على صغاره، ويعرف يصون.. حتى وإحنا كبار شايلة همنا وشغلاك الظنون..

يا شايلة همى وواقفة معايا فى لحظة الضيق ماليش غيرك فى الدنيا قلب حنون..

 يا أمى يا غالية يا أحسن صديق وأحن رفيق عطائك مش محدود..

يا ماسحة الدمعة من على الخدود..

ربيتى نساء ورجال صالحين.

وبدعاكى يا امى فى جنة المولى عشمانين

يا مجمعه الشمل، ومن كرمك مش حرمانة يا نهر الحنان

 وصى عليكى النبى العدنان

 ومن سابع سما وبالوالدين إحسان مذكورة فى القرآن..

ده رضاكى علينا يدخلنا جنة الرحمن

وعلشان ولادك التعب بيهون

 ومهما يمر الزمان ويتغير المكان

مافيش غيرك حصن للأمان..

يا عطر الورود طول الأوان..

بتمنى من ربى تفضلى عفية فى وش الزمان..

يا أحن قلب وأجمل إنسان..

يا أمى يا غالية يا نبع الحنان..