علمنى العوم والنبى يا أحمد
علمنى ولا تسيبنى اغرق
علمنى ولا تجبلى مركب
مركب بشراع جاهزة اركب
أخاف أركب أحسن تغرب
تبعد بيه ولا تقرب
لا أعرف أرجع ولا أهرب
علمنى ده البحر واسع
أخاف أمشى ومش راجع
أخاف البحر يغدر بيه
والموجه تبقى عالية عليه
وفى لحظة تغرق المركب
وسنين العمر تتسرسب
لا أعرف أرجع للشط تاني
واغرق فى التوهه وأعانى
علمنى العوم يا متعلم
من غير حوارات ولا تأفلم
علمنى وخد بيدي
على الموجة سوا نعدي
علمنى يكون إيه الجواب
وإيه الحل والأسباب
علمنى كل علامك
حتى الثقافة فى كلامك
علمنى يكون لى قيمة
مش همبكة وشغل سيما
علمنى دى المظاهر خداعة
تيجى وتروح فى ساعة
علمنى يكون لى شخصية
تبقى طبيعية وحقيقية
علمنى ما ألبس قناع
قناع مزيف قناع خداع
علمنى وبلاش عنصرية
اللون والدين مش القضية
علمنى بطريقة حضارية
وعاملنى بطريقة ادمية
أنا عندى رغبة قوية
إنى أكون بكره أفضل
أنا ليه عقل يفكر
يعرف يختار ويقرر
أنا مش محتاج سنين
علشان أعرف وأقرر
علمنى علام واضح ظاهر
الدنيا مش ألقاب ومظاهر
علمنى يا أحمد العوم
ولا تبقى حياتى أنام واقوم
عدد الردود 0
بواسطة:
محمد أبوهرجة
التعليم والصحة
الله عليك يا استاذ وائل التعليم والصحة هما اساس اى تقدم بلا تعليم جيد وصحة جيدة لن تتقدم مصر خطوة للامام احسنت وان كنت اريد ان اطيل اكثر فلا نشبع من ابياتك الجميلة والسهل الممتنع بلا اى فلسفة او صعوبة كلمات سلسة وبسيطة وعميقة جدا