وحشتيني
رسايلك حتى رناتك
ودلعك وسط خطواتك
وصوت نبضك مع جنانك
ولون لبسك وبرفانك
سكوتك وانتى زعلانة
كلامك وانتى مخنوقة.. وتعبانة
وحشتينى... يا كل الكون ف إنسانة
ياروح بتطلى على قلبى بورداية
بكل نسيمها مليانة
ياحضن بيجمع التفاصيل
ياحد بخاف عليه جدا
مفيش لعنيكى أى بديل
يابدر ف نص قصر النيل
وشمس تدفى وتداوى
ف قلب عليل
يا أجمل من جميع الناس..
ده عقلى وكل أفكارى
وقلبى رضاكى عنه سبيل
عليكى قليل
وحشتينى..
وجودك حتى ف غيابك
ولما ساعات كتير جدا
بخبطلك على بابك
ولما الشوق ياخدنى بعيد
صحيح بتعب لكنى بعيش
وبستنى..دى شوفتك عيد
بجيب الذكريات جنبى..وهى بعيد
وحشتيني
ياضى العين.. هروحلك فين
نسيت انا مين..
ومش بنساكى ولا ثانية
ياأول واحده ف الدنيا.. ومش تانية
وفبعادك
خلاص ضهرى بقا محنى
وقلبى م الوجع مدبوح
ماهوش قادر يسامحني
بقيت عايش حلاوة روح
يارب الحل من عندك
عشان البعد قاتلنى
وخف ياعمرى من عندك
لا بعرف بعيش..
ولا الموت لحظة طايلني
وحشتينى..
تم أضافة تعليقك سوف يظهر بعد المراجعة