المجد لكل الأحباء
اللى الحب نور طريقهم
جريوا ورا نوره كأنهم فى سباق
عاشق ومعشوق وعشق وعشاق
دى مفردات الحب اللى اتعلمناه
واللى لما همس سمعنا النداء
ونفذنا وعدنا معاه
أنه رمز للسعادة مش للفراق
انه شئ العمر بيستناه
وممكن مش يلقاه
ولو الحب ساب طريقك
روح أنت اجرى وراه
امسك فيه وناديه وحن عليه
يحن اليك ويديك اللى تتمناه
لحظة ما تلاقى حبيب تبقى دنياه
تبقى الجنة بينكم هى حياة
اه لو تعرف معناه
لما حد يقولك بحبك
وتعيش أنت جواه
هتكون نجوم الليل فى سماه
وقمره وشمسه اللى بتدور وياه
فى فلكه ماتعرفش منتهاه
ايوا هى يا عينى هى عينه
وهو عاشقها وهى عاشقاه
ومناها تنول رضاه
وهو مناه من الأشواق
يتنفس معاها هواه
وده الحب اللى عرفناه
واللى العشق يادوب نجمة فى سماه
دروبه طويلة بحوره كبيرة
ولكن برضه هو حياة
تم أضافة تعليقك سوف يظهر بعد المراجعة