فيسبوك
واتساب
حبال الود ليه دايبة؟
وفيها القلب متشعلق
يدق جرسنا فنلملم
حنان الحب متفرّق
وبسمة وش بتنوَّر
وعينى ف عينها تتعلَّق
واتدفى ف كون وهمى
ببصة عينها بتدقق
فى لون عينى ولون شعرى
بلبسى المكوى متروّق
أدوب خجلان ف كسوفى
وحرف لسانى يتعلّق
ما نمتش ف ليلى يا قمرى
لشمسك ف انتظار تشرق
فتتبسم أقول طلعت
ويجرى القلب ويدقدق
طابور الصبح يتحرك
على نبضى
وشمس الكون بتروينى
وتدينى
نصيب م الحب وتفرّق
واعلَّق حبى فوق وهمى
فى حبله الدايب أتعلَّق
حبال الود ليه دايبة؟
وفيها القلب متشعلق؟
