ياعم ياللى ماشى خدنى لنهاية مشوارى وياك
شمس النهار غابت طرحت فى طريقى اشواك
والضلال بقى فى العالى وتحته الحق فى هلاك
وترعة الخير من شدة زعلها هجرتها الاسماك
رد الزمان قال ياابنى بكره هتحصد زرع ايديك
لا تصاحب عديم دين لسانه سم فى عسل فتاك
ياعم خدنى عكازك اسمع منك ولنهاية الطريق
علمنى ازاى اعرف ابو ضحكة عدو او صديق
فى مشوارى محطات البعض نار للادب حريق
والبعض عايش فى وهم وخيبة الامل له رفيق
رد الزمان قال خليك زى نور شمس الصبحية
نوح نصح ابنه اللى بسوء ظنه بالموج غريق
ياعم ليه من غير سؤال خدت منى وياك الخير
قلة حبنا ميه زلال وليه كسرتها بنت عم الزير
والفرن البلدى دخانه اعلان عن بتاوى وفطير
وكانون وسط الدار كان براد الشاى عليه امير
رد الزمان ازرع شجرة على باب مداخل الدار
اسقيها حب وصى العيال يسقوها امل وضمير
ياعم املى بقى مسجون وعايش بالحب جوايا
خايف عليه من نوة شتا يغرق يودع كل منايا
واغوص فى بحر الندم وسنين عمرى ضحايا
وريشة الزمان على وشى ترسم وشم وزوايا
رد الزمان قال وداع الدنيا سنة ربنا فى خلقه
احفظ لسانك طهره استغفار دايما من الخطايا
كتبت على قلبى مطلوب صاحب يكون مجدع
عاشق الحق سيف على كل مضل لا يتزعزع
ونصيحته تكون نور لكل الناس هداية تسطع
يرد غيبة المغتاب ولا يردد نميمة عليه افظع
رد الزمان قال على شباك الدار ازرع الازهار
تلاقى طيور السعادة مع ادان الفجر لك تركع
