فيسبوك
واتساب
لسة فاضل كام هزيمة
وانتصار واحد يتيم خارج حدود المعركة
وقلب كان عاصى الاوامر
فات مكانه مع الرماة وانشغل يجمع غنايمه م الليالى المهلكة
لسة فاضل دقتين لعقربين
من ساعة راكنة ع الجدار
بين كاتينة عمر رايح ..وروح بترمح منهكة
والجميع مستنى يقطع ورقة الليلة الاخيرة فى النتيجة
أو يودع أمنياته ببوسة جامدة فوق جبين آخر دقيقة
والنتيجة ..الجميع آخر السنة بقلوب بريئة
والسنين هى الملامة ع المآسى والبكا !!!
السنين أس الجريمة ..أما افكارنا اللئيمة غير مدانة
احنا يعنى محض دانة
والمدافع وجهتنا ..
فانفجرنا ف حضن بعض وانضربنا بنار جهتنا..وبقصص متفبركة
السنين أس الجريمة واحنا بعقولنا العظيمة
دمية خيوط متحركة
كله مستنى النهاية
أما روحى لسه واقفة عند عتبة حلم ولى
لسه والله
خايفة تتقدم صفوف الحب تاني
والتقيها سيف بينزف م اللى باقى من أماني
والتقينى فاتحة لسة باب ضلوعى للوجع
واشترى منكو الرخيص واللى كان ع الرف دايما مرتجع
لقلوب بترمى كل عام اقدم مشاعر
وتحدّف الحب اللى عابر بالقلل
سانتا يرمى كوم هدايا لعام جديد
وعيون تشوف من حسنها بس الخلل
وانا اللى بستنى المطر لو كان بعيد
وراضية من فيض السما بحبة بلل
